बेइजिङः चीनले अन्तरिक्ष सहयोगका क्षेत्रमा हरेक वर्ष नयाँ फड्को मारिरहेको छ । सन् २०२० मा चीनले ५९ मुलुकका व्यावसायिक उपग्रहको प्रक्षेपण गरिदिएको छ, र यसका लागि चीनले ५१ वटा रकेट प्रक्षेपण गरेको थियो ।
जनवरी र नोभेम्बरमा चीनको लङ मार्चले अर्जेन्टिनाका १२ वटा व्यावसायिक रिमोट सेन्सिङ भूउपग्रह प्रक्षेपण गरेको थियो । चीनको ग्रेटवाल इन्डस्ट्री कोअपरेसनबाट ९० वटा उपग्रह प्रक्षेपण गर्न अर्जेन्टिनाको स्याटेलोजिकले समझदारी गरेको छ ।
डिसेम्बरमा इथियोपियाले चीनकै सहयोगमा एउटा भूउपग्रह प्रक्षेपण गरेको थियो । यो प्रक्षेपण चीनको हैनान प्रान्तस्थित वेन्चाङ स्पेसक्राफ्ट लन्च साइटबाट गरिएको थियो । यो उपग्रहको प्रारम्भिक डिजाइन इथियोपियामा गरिएको थियो भने इथियोपियाली–चिनियाँ इन्जिनियरिङ टोलीले प्राविधिक र विस्तृत डिजाइन गरेको थियो ।
अफ्रिकाका लागि सेटेलाइट टिभी
सन् २०१५ मा दक्षिण अफ्रिकाको जोहानेसबर्गमा सम्पन्न चीन–अफ्रिका सहयोग शिखर बैठकमा चीन सरकारले १० हजार अफ्रिकी गाउँहरुमा सेटेलाइट टिभीको पहुँच उपलब्ध गराउने प्रतिबद्धता व्यक्त गरेको थियो ।
चीनको अन्तरिक्ष निकायका अनुसार १९ वटा अफ्रिकी मुलुकले सन् २०२० मा परियोजना सम्पन्न गरिसकेका छन् । यसबाट करिब ८ हजार १६२ गाउँमा सुविधा पुगिसकेको छ । परियोजना मातहत केन्या, दक्षिण अफ्रिका, घाना, उगान्डा, कंगो समेतका मुलुकमा प्राथमिक र निम्न माध्यमिक तहका विद्यार्थीका लागि शैक्षिक भिडियो उत्पादन गर्ने गरी अर्को परियोजना पनि चालू छ ।
चिनियाँ अन्तरिक्ष विज्ञानको प्रतिवेदन अनुसार सन् २०२० सम्ममा चिनियाँ अन्तरिक्ष भूउपग्रहले ३० भन्दा बढी मुलुकमा विपद् सहायतामा मद्दत गरेका छन् । XINHUA-RSS
