काठमाडौं । प्रधानमन्त्री कप एकदिवसीय पुरुष राष्ट्रिय क्रिकेट प्रतियोगितामा नेपाल पुलिस क्लबले शसस्त्र प्रहरी बल (एपीएफ) लाई ५८ रनले हराएको छ ।
भैरहवास्थित सिद्धार्थनगर रंगशालामा पुलिसले खिएको १ सय ४६ रनको लक्ष्य पछ्याएको एपिएफ ३४ ओभरमा ८७ रन बनाएर अलआउट भयो । एपिएफका लागि सन्दीप जोरा २५ रन जोड्दै नटआउट रहे । एक समय ४०-७ को स्थितिमा रहेको एपिएफलाई अमर र सन्दीपले आठौं विकेटका लागि ४३ रनको साझेदारी गर्दै खेलमा फर्काउने प्रयास गरेका थिए । अमर २३ रन जोडेदै आउट भए ।
यस्तै, प्रज्वल शाहीले १३ रन बनाउदा अन्य ब्याट्सम्यानले दोहोरो अंक छुन सकेनन् । प्रदीप ऐरीले ४, भुवन कार्कीले ४, पुरन विकेले १ र सुमित महर्जनले २ रन बनाउदा कप्तान रोहित पौडेल र विकेटकिपर लोकेश बमले खाता खोल्न सकेनन् ।
पुलिसको लागि बायाँ हाते स्पिनर ललित नारायण राजवंशीले ५ विकेट लिए ।
त्यसअघि टस हारेर ब्याटिङको निम्तो पाएको पुलिसले १ सय ४५ रन जोडेको थियो । पुलिसका लागि ओपनर दिलिप नाथले सर्वाधिक ४४ रन जोडे । अर्जुन साउदले ३१, शंकर रानाले २२ र दीपेन्द्र सिंह ऐरीले १५ रन बनाएका थिए ।
एपिएफका भुवन कार्कीले ३ विकेट लिँए । अमर राउटेला र रमेश कुर्मीले २/२ विकेट लिदा पुरण विक, रोहित पौडेल र मौसम ढकालले १/१ विकेट लिए ।
यस जितसँगै पुलिस ४ खेलमा ४ जित दर्ता गर्दै ८ अंकका साथ तालिकाको शीर्षस्थानमा उक्लियो । एपिएफ भने ४ खेलमा ४ अंकसाथ पाँचौ स्थानमा छ । बागमती पनि ८ अंकसाथ रनरेटका आधारमा दोस्रो स्थानमा छ ।
