अबुधाबीः युनाइटेड अरब ईमिरेट्सको अबुधाबीमा जारी जिम्बाबे र अफगानिस्तानबीचको पहिलो टेस्ट क्रिकेटमा अफगानिस्तानले शानदार प्रदर्शन गरेको छ ।
पहिलो इनिङमा ५४५ रन बनाएर जिम्बाबेमाथि दबाब सिर्जना गरेको अफगानिस्तानले जिम्बाबेलाई पहिलो इनिङमा २८७ रनमा समेटेको थियो । अफगानिस्तानका लागि रसिद खानले ४, अमिर हम्जाले ३, साइद शिराजले २ विकेट लिएका थिए ।
जिम्बाबेका लागि सिकन्दर रजाले ८५, प्रिन्स माउभोरले ६५, केभिन कसुजाले ४१, तारिसाई मासाकान्डाले ४१ रन बनाएका थिए ।
यसअघि टस जितेर पहिले ब्याटिङ रोजेको अफगानिस्तानका लागि पहिलो इनिङमा हस्मतुल्लाह शाहिदीले २००, अस्गर अफगानले १६४, नासिर जमालले ५५, इब्राहिम जड्रानले ७२ रनको मद्दतले चार विकेटको क्षतिमा ५४५ रनको विशाल स्कोर खडा गरेको थियो ।
अफगानिस्तानका लागि यो आजसम्मकै सबैभन्दा ठूलो स्कोर हो भने अफगानिस्तानका हस्मतुल्लाहले पहिलो पटक अफगानिस्तानका लागि दोहोरो शतक प्रहार गरेका थिए ।
जिम्बाबेले आजै दोस्रो इनिङको ब्याटिङ शुरु गरेको छ । AFP
