काठमाडौं । चौथो टाइगर कपअन्तर्गत महिलातर्फ समूह बी को खेलमा त्रिभुवन आर्मी क्लबले भारतको हरियाणालाई पाँचौ सेटमा पराजित गरेको छ ।
प्रतिस्पर्धापूर्ण खेलमा आर्मीले आमन्त्रित क्लब हरियाणालाई ३–२ को सेटमा हराएको हो ।
पोखरा रंगशालामा भएको खेलमा आर्मीले पहिलो सेट २५-२२ ले जितेको थियो । त्यसपछि हरियाणाले २५-२० र २५-१८ ले लगातार सेट जित्दै २-१ को अग्रता लियो । आर्मीले चौथो सेटमा २५-१७ र पाँचौ सेटमा १५-१२ को जित निकाल्दै जित निकालेको हो ।
यससँगैै आर्मीले २ खेलमा २ अंक जोडेको छ भने हरियाणाले १ अंक जोडेको छ । यस नतिजाले ३ अंक बनाएको न्यु डायमन्ड भने सेमिफाइनलमा पुगेको छ । भोली न्यु डायमन्डले हरियाणासँग खेल्नेछन् । यस्तै, समूह ए मा रहेको पुलिसले पनि सेमिफाइनलमा स्थान बनाईसकेको छ ।
प्रतियोगिताको विजेता टोलीले ५ लाख ५५ हजार ५ सय ५५, दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।
