काठमाडौं । प्रधानमन्त्री कपमा कप्तान विनोद भण्डारीको कीर्तिमानी शतकमा त्रिभुवन आर्मी क्लबले मधेश प्रदेशलाई ३ सय २१ रनको विशाल लक्ष्य दिएको छ ।
टियु क्रिकेट मैदानमा टस हारेर पहिला ब्याटिङको निम्तो पाएको आर्मीले निर्धारित ५० ओभरमा अल आउट हुँदै ३ सय २० रन बनायो । आर्मीको लागि विनोद भण्डारीले १ सय १३ रनको शतकीय इनिङ खेले । उनले ९३ बलमा ९ चौका र ६ छक्का हिर्काए ।
यससँगै, विनोद पिएमकपमा दुई शतक बनाएका छन् । उनले यसअघि २०२१ को पिएमकपमा गण्डकी प्रदेशविरुद्ध १ सय ११ रन बनाएका थिए । उनको करिअरको चौथो शतक हो ।
एक समय १०२–५ अवस्थामा रहेको आर्मीलाई पाँचौं विकेटका लागि विनोद र कुशल मल्लले १ सय १८ बलमा १ सय ३२ रनको शतकीय साझेदारी गर्दै खेलमा फर्काएका थिए । कुशल ३७ रन बनाउदै आउट भए । यस्तै, सन्तोष कार्की ४२, इमरान शेख २६, विवेक यादव ३७, भीम सार्की १८, बसिर अहमद १६ र सोमपाल कामीले ६ रन बनाए ।
मधेशको लागि रन्जित कुमारले सर्वाधिक ५ विकेट लिए । विशाल सिंहले २ विकेट लिँदा रुपेश र राजेश यादवले १-१ विकेट लिए ।
