एजेन्सी । भारतले अफगानिस्तान विरुद्धको टी–२० सिरिजको पहिलो खेल ६ विकेटले जितेको छ । भारतले अफगानिस्तानविरुद्धको अपराजित कीर्तिमान कायम राखेको छ । टी-२० मा अफगानिस्तानमाथि भारतको यो पाँचौं जित हो ।
यो जितसँगै भारतीय टोलीले ३ खेलको सिरिजमा १–० को अग्रता बनाएको छ । सिरिजको दोस्रो खेल १४ जनवरीमा इन्दौरमा हुनेछ ।
मोहालीमा बिहीबार भएको खेलमा भारतले टस जितेर बलिङ गर्ने निर्णय गरेको थियो । पहिले ब्याटिङ गरेको अफगानिस्तानले २० ओभरमा ५ विकेट गुमाएर १५८ रन बनाएको थियो । जवाफमा भारतीय टोलीले १७.३ ओभरमा ४ विकेटको क्षतिमा लक्ष्य पूरा गर्यो ।
शिवम दुबेले अविजित ६० रन बनाए भने जितेश शर्माले ३१ रनको इनिङ खेले । ओपनर शुभमन गिलले २३ रन र तिलक वर्माले २६ रनको योगदान दिए । बलिङमा मुकेश कुमार र अक्षर पटेलले २–२ विकेट लिए ।
पावरप्लेमा अफगानिस्तानले रोहितको रनआउट र माजिबको विकेटले दबाब सिर्जना गरेको थियो । एक समय टीम इन्डियाको स्कोर २८ रनमा दुई विकेट थियो ।
तर मध्य ओभरमा आएका अफगान बलरले पावरप्लेमा सिर्जना भएको दबाबको फाइदा उठाउन सकेनन् र तिलक र शिवम दुबेले टोलीलाई समस्याबाट निकाल्न सफल भए । दुवैले तेस्रो विकेटका लागि ४४ रनको साझेदारी गरे ।
दुबेले जितेश शर्मासँग ४५ रन जोडेर साथ दिए । अन्त्यमा फिनिसर रिंकु सिंहले केही राम्रा प्रहार गरे । उनले ९ बलमा १६ रनको इनिङ खेले ।
टस हारेर पहिले ब्याटिङमा आएको अफगानिस्तानको टोलीले उत्कृष्ट सुरुवात गरेको थियो । टोलीले पहिले ८ ओभरमा बिना कुनै विकेटको ५० रन बनाएको थियो तर टोलीले नवौं र दशौं ओभरमा गुरबाज र जद्रानको विकेट गुमाएको थियो ।
इब्राहिम जद्रान र रहमानउल्लाह गुरबाजको जोडीले पहिलो ६ ओभरमा ३३ रन मात्र जोड्न सके । अक्षरले आठौं ओभरमा गुरबाजको विकेट लिएर यो साझेदारी तोडेका थिए । ९औं ओभरमा जद्रान फर्किए र त्यसपछि १० औं ओभरमा अक्षर पटेलले रहमत शाहलाई ३ रनमा बोल्ड गरे ।
यहाँबाट मोहम्मद नाबी आए र अजमातुल्लाह ओमरजाईसँग अर्धशतकीय साझेदारी गरे । नाबी र ओमरजाईबीच चौथो विकेटका लागि ४३ बलमा ६८ रनको अर्धशतकीय साझेदारी भएको थियो । यो साझेदारीमा ओमरजाईले १८ बलमा २६ रन बनाए भने नाबीले २५ बलमा ४१ रन जो डे। ओमरजाई २९ रन बनाएर आउट भए भने नाबी ४२ रन बनाएर आउट भए । नजिबुल्लाह जद्रान १९ रन र करिम जनात ९ रनमा अविजित रहे ।
नाबीको इनिङ्सले अफगानिस्तानलाई बल दियो । जसका कारण अफगानिस्तानले भारत विरुद्धको टी–२० मा सर्वाधिक रन बनायो । टोलीले २० ओभरमा ५ विकेट गुमाएर १५८ रन बनाएको हो ।
१५९ रनको लक्ष्य पछ्याउन आएको भारतीय टोलीले शून्य रनमा पहिलो विकेट गुमाएको थियो । यहाँ भारतीय कप्तान रोहित शर्मा इनिङ्सको दोस्रो बलमा खाता नखोल्दै आउट भए । यस्तो अवस्थामा शुभमन गिल र तिलक वर्माले इनिङ्सलाई अगाडि बढाए ।
पावरप्लेको अन्त्यसम्ममा भारतीय टोलीले ३६ रनमा दुई विकेट गुमाएको थियो। गिल (२३ रन)लाई विकेटकिपर रहमानउल्लाह गुरबाजले स्टम्प गरेका थिए । त्यसपछि ९औं ओभरमा तिलक वर्मा (२६ रन)लाई गुलबदिन नाइबले क्याच आउट गरे । दुबेले वर्मासँग ४४ रनको साझेदारी गरे ।
त्यसपछि जितेश शर्माले दुबेलाई साथ दिए । जितेशले २० बलमा ३१ रनको इनिङ खेल्दै स्कोरलाई गति दिए र दबाब मुक्त गरे । १४ औं ओभरमा जितेश शर्माको विकेट मुजिब उर रहमानले लिए । तिलकको विकेटपछि रिंकु सिंह आए र अन्तिमसम्म रहे । १८औं ओभरमा शिवम दुबेले छक्का र चौका प्रहार गर्दै टीम इन्डियालाई जित दिलाए । उनले ४० बलमा ६० रनको अविजित इनिङ खेले । रिंकुले ९ बलमा १६ रन बनाए ।
