एजेन्सी । साउथकी चर्चित अभिनेत्री नयनताराको फिल्म ‘अन्नपूर्णी’को विवाद बढ्दै गएको छ । एकातिर अभिनेत्री नयनताराविरुद्ध एफआइआर दर्ता भएको छ भने अर्कोतर्फ अभिनेत्रीको फिल्म नेटफ्लिक्सबाट डिलिट गरिएको छ ।
डिसेम्बर १ मा सिनेमाघरमा रिलिज भएपछि अभिनेत्री नयनताराको ‘अन्नपूर्णी’ अब ओटीटी प्लेटफर्म नेटफ्लिक्समा रिलिज भएको थियो । फिल्म रिलिज भएको करिब एक महिना नबित्दै देशभर फिल्मलाई लिएर हंगामा सुरु भएको छ ।
फिल्ममा भगवान रामको बारेमा आपत्तिजनक टिप्पणी गरिएको भन्दै धेरैको धार्मिक भावनामा चोट पुगेको बताइएको छ ।
यस फिल्ममा भगवान श्रीरामलाई मासु खाने व्यक्तिको रूपमा वर्णन गरिएको छ, जसका कारण यो फिल्म लगातार विवादमा परेको छ । नीलेश कृष्णले निर्देशन गरेको ‘अन्नपूर्णी’ मा नयनताराले अन्नपूर्णीको भूमिका निभाएकी छिन् । अन्नपूर्णी पुजारीकी छोरी हुन् । उनी सानैदेखि शेफ बन्न चाहन्छिन् ।
फिल्मको एक दृश्यमा तालिमको क्रममा अन्नपूर्णी भान्साको काम पूरा गर्न नसकेर बेहोस भइन् भन्ने देखाइएको थियो । यस्तो अवस्थामा फरहानले उनलाई सम्झाउँदै रामायणको उदाहरण दिन्छन् ।
उनी भन्छन्, ‘रामायणमा वाल्मीकिले भनेका छन् कि जब भगवान राम, सीता र लक्ष्मण जङ्गलमा भोकाएका थिए, उनीहरूले जनावरहरूलाई मारेर खाए । रामायणमा पनि मासु खाएको लेखिएको छ ।’
नयनतारा र निर्देशक-निर्माता र नेटफ्लिक्स इन्डिया कन्टेन्ट हेड मोनिका शेरगिल विरुद्ध मुद्दा दर्ता गरिएको छ । जबलपुरमा एक हिन्दू संगठनले फिल्मको सम्पूर्ण स्टार कास्ट, निर्माता र निर्देशक विरुद्ध एफआईआर दर्ता गरेको छ ।
