टोकियो । जापानको एक अदालतले समलिङ्गी विवाहलाई कानूनी मान्यता नदिनु संविधानको उल्लङ्घन हुने फैसला सुनाएको छ । समलिङ्गी विवाहलाई मान्यता नदिनु संविधानको उल्लङ्घन हो भनी होक्काइदो क्षेत्रमा बसोबास गर्ने ३ जोडी समलिंगीहरुले दायर गरेको मुद्दामा साप्पोरो जिल्ला अदालतले यस्तो फैसला सुनाएको हो ।
ति जोडीहरुले राज्यसंग क्षतिपूर्तिको माग समेत गरेकोमा क्षतिपूर्ति पाउनु पर्ने मागलाई भने अस्वीकार गरेको छ । उनीहरुले समलिङ्गी विवाहलाई मान्यता दिनुपर्ने माग राख्दै ३ वर्ष अघि साप्पोरो जिल्ला अदालतमा सरकार बिरुद्ध मुद्दा दायर गरेका थिए ।
जापानको राजधानी टोकियो सहित नागोया, ओसाका, फ़ुकुओका र साप्पोरोका अदालतमा एउटै प्रकृतिका मुद्दाहरु विचाराधीन भए पनि साप्पोरो जिल्ला अदालतले छिटो फैसला सुनाएको हो । समलिङ्गी विवाहको पक्षमा भएको यो पहिलो फैसला हो ।
संविधानको धारा २४ मा 'विवाह दुइ पक्षको सहहति अनुसार' भनेर उल्लेख गरेकाले समलिङ्गी विवाहलाइ कानूनले बर्जित गर्न नमिल्ने उनीहरुको दाबी थियो । तर सरकारी अधिकारीहरुले भने 'दुइ पक्षको सहमति अनुसार' भन्नुको अर्थ महिला र पुरुषबीचको सहमति भन्ने अर्थ भएको जिकिर गर्दै आएका थिए ।
यस अघि गत बर्षको मार्च महिनामा टोकियो उच्च अदालतले समलिङ्गी विवाहलाई कानूनी मान्यता दिन नमिल्ने तर पार्टनरको रुपमा स्वीकार गर्ने फैसला गरेको थियो । जापानमा समलिङ्गीले विवाह गरेता पनि कानूनी रुपमा दर्ता गर्न मिल्दैन । कारण, जापानको कानूनमा महिला र पुरुष बीच मात्रै विवाह हुने भनेर उल्लेख गरिएको छ ।
