काठमाडौं । अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)ले रोजगार अनुमति प्रणाली मार्फत रोजगारीका लागि दक्षिण कोरिया जान चाहेका युवाहरुले पानी जहाज निर्माण कम्पनीमा आवेदन दिएकाले उत्पादन क्षेत्रमा समेत भाषा परीक्षा दिन पाउनु पर्ने माग राखी गरेको आन्दोलनको क्रममा सरकारको तर्फबाट भएको दमको निन्दा गरेको छ ।
सरकारका मन्त्री सवार गाडीमा आगजनी भएको निहुँमा बेरोजगारीको पिडाले छटपटिएर सडकमा आएका युवा माथि शुक्रबार भएको प्रहरी दमन र प्रहरी दमनका क्रममा सुजन राउत र वीरेन्द्र शाहको ज्यान गएको घटना प्रति अनेरास्ववियु भर्त्सना गरेको छ । सो घटनालाई केबल मन्त्री सवार गाडीमा भएको आगजनीको रूपमा नबुझी आम बेरोजगार युवाहरूको पीडाका रूपमा बुझी आन्दोलनका मागहरू पुरा गर्न अनेरास्ववियुले माग गरेको छ ।
साथै अनेरास्ववियुले विना सर्त पक्राउ परेका युवाहरूलाई तत्काल रिहा गर्न, मृत्यु भएका युवाहरूको परिवारलाई उचित क्षतिपूर्तिको व्यवस्था गर्न, घाइतेहरूको उपचारको व्यवस्था गर्न र प्रहरी दमनबाट होइन आन्दोलनरत युवाहरूको पिर मर्का बुझी वार्ता र संवाद मार्फत समस्याको समाधान खोज्न माग गरेको छ । अनेरास्ववियुले घटना हुनुको कारण सरकार रहेको जनाएको छ ।
‘आजको घटना घट्नुमा स्वयं सरकार र प्रहरी प्रशासन जिम्मेवार रहेको अनेरास्ववियुको ठहर छ, देशमै रोजगारी उपलब्ध गराउन नसक्ने सरकारले यसरी युवाहरूलाई बल प्रयोग गरी दमन गर्ने कार्यले राज्य प्रणाली र व्यवस्थामाथि वितृष्णा पैदा गरी मुलुकलाई थप अस्थिरता र हिंसा तर्फ धकेल्न समेत सक्ने हुनाले त्यस तर्फ सचेत रहन सरकारको ध्यानाकर्षण समेत गराउन चाहन्छौँ’, अनेरास्ववियुका अध्यक्ष समिक बडालले शुक्रबार जारी गर्नुभएको विज्ञप्तिमा उल्लेख छ ।
देशमै रोजगारी सिर्जना गरेर युवा पलायन रोक्न पहल गर्नुको सट्टा दिउसै युवा माथि गोली बर्साउने सरकारको गलत रवैयाको भण्डाफोर गर्न र सशक्त आन्दोलनका लागि तयार रहन पनि अनेरास्ववियुले विद्यार्थीलाई आह्वान गरेको छ ।
