काठमाडौँ । आगामी सिजनको पाकिस्तान सुपर लिग (पिएसएल) क्रिकेट प्रतियोगितामा नेपाली खेलाडीलाई मैदानमा देख्न नपाइने भएको छ । पीएसएलको बुधबार राति सम्पन्न ‘ड्राफ्ट’ मा कुनै पनि नेपाली खेलाडी बिकेनन् ।
पीएसएल २०२४ को लागि राष्ट्रिय क्रिकेट टीमका १० खेलाडीले नाम दर्ता गराएका थिए । ड्राफ्ट लिष्टमा सन्दीप लामिछाने, गुलशन झा, आरिफ शेख, अर्जुन साउद, देव खनाल, दीपेन्द्रसिंह ऐरी, कुशल भुर्तेल, कुशल मल्ल र सोमपाल कामी परेका थिए ।
नेपालका स्टार स्पिनर सन्दीप लामिछाने प्लेटिनमको लिस्टमा परेका थिए। तर उनीलाई कुनै पनि क्लबले खरिद गरेनन् । सन्दीपले यसअघि नै पीएसएल खेलिसकेका थिए । उनले यसअघि लाहोर क्वालन्डर्सबाट खेलेका थिए ।
यस्तै, अलराउन्डर गुलशन झा गोल्ड क्याटेगोरीमा परेका थिए भने आरिफ शेख, आसिफ शेख, अर्जुन साउद, देव खनाल, दीपेन्द्रसिंह ऐरी, कुशल भुर्तेल, कुशल मल्ल र सोमपाल कामी सिल्भर क्याटेगेरीमा परेका थिए । तर, यसपटक कुनै पनि नेपाली खेलाडी पीएसएल क्लबहरुको रोजाइमा परेनन् ।
पीएसएलको आगामी संस्करण सन् २०२४ को फेब्रुअरी १३ देखि मार्च १८ सम्म आयोजना हुँदैछ ।
