एजेन्सी । भारतीय क्रिकेट कन्ट्रोल बोर्ड (बीसीसीआई)ले बिहीबार नोभेम्बर २९ मा मुख्य प्रशिक्षक राहुल द्रविडसहित सहायक स्टाफको सम्झौता लम्बिएको घोषणा गरेको थियो ।
अर्थात् राहुल द्रविड भारतीय टोलीको मुख्य प्रशिक्षक रहनेछन्, तर द्रविडले भने यसबारे चकित पार्ने खुलासा गरेका छन् ।
बीसीसीआईले बिहीबार विश्वकप र सम्झौता पुनरावलोकन बैठक आयोजना गरेको थियो । यस भेटपछि राहुल द्रविडले आफूले बीसीसीआईसँग सम्झौता नगरेको बताए । यद्यपि, कार्यकालका बारेमा छलफल भएको बताउँदै कागजातहरू प्राप्त गरेपछि आफूले हस्ताक्षर गर्ने जनाएका थिए ।
राहुल द्रविडको कार्यकाल आईसीसी विश्वकप २०२३ पछि समाप्त भएको छ । बीसीसीआईले द्रविडमाथि विश्वास व्यक्त गर्दै उनलाई टोलीको मुख्य प्रशिक्षकमा निरन्तरता राख्ने सहमति जनाएको छ । साथै, बीसीसीआईले राहुल द्रविडसँग सार्थक छलफल गरेको थियो र छलफलपछि, मुख्य प्रशिक्षकको रूपमा राहुल द्रविडको सम्झौता लम्ब्याउने सर्वसम्मतिले सहमति भएको थियो ।
राहुल नोभेम्बर २०२१ मा टीम इन्डियाको मुख्य प्रशिक्षक नियुक्त भएका थिए । द्रविडको दुई वर्षको कार्यकालमा टीम इन्डिया एकदिवसीय विश्वकपको फाइनलमा पुगेको थियो । फाइनलमा अस्ट्रेलियासँगको हार बाहेक, भारतले विश्वकपमा आफ्ना सबै खेल जितेको थियो । योसँगै विश्वकप अघि भारतले एसिया कप जितेको थियो । गत वर्ष अष्ट्रेलियामा भएको टी–२० विश्वकपमा भारतले सेमिफाइनल खेलेको थियो ।
यस बाहेक भारतले अष्ट्रेलिया, श्रीलंका र न्युजिल्याण्डविरुद्धको घरेलु टेष्ट सिरिज र बंगलादेशमा सिरिज जितेको थियो । साथै, भारतले वेस्ट इन्डिज, अष्ट्रेलिया, दक्षिण अफ्रिका, न्यूजिल्याण्ड र श्रीलंका विरुद्धको घरेलु टी–२० सिरिज जित्न सफल भएको थियो ।
तर, दक्षिण अफ्रिका भ्रमणमा टेष्ट र एकदिवसीय सिरिजमा पराजय बेहोरेको थियो । यसबाहेक इंग्ल्याण्डमा भएको पाँचौं टेस्टमा पनि भारत पराजित भएको थियो ।
