एजेन्सी । भारतीय क्रिकेट टोलीको प्रशिक्षकमा राहुल द्रविडको निरन्तरता हुने भएको छ । भारतीय क्रिकेट कन्ट्रोल बोर्ड (बीसीसीआई)ले उनको कार्यकाल थप गरेको छ । बोर्डले बुधबार यो घोषणा गरेको हो ।
द्रविडको दुई वर्षको कार्यकाल विश्वकपको फाइनलसँगै समाप्त भएको थियो । यसपछि बोर्ड र द्रविडबीच छलफल भयो र द्रविड कम्तिमा टी–२० विश्वकपसम्म टोलीसँग आबद्ध रहने निर्णय भएको थियो । टी–२० विश्वकप जुनमा वेस्ट इन्डिज र अमेरिकाले आयोजना गर्दैछ ।
भारतले १० डिसेम्बर २०२३ देखि ७ जनवरी २०२४ सम्म तीन टी–२०, तीन एकदिवसीय र दुई टेस्ट म्याचका लागि दक्षिण अफ्रिकाको भ्रमण गर्नेछ । बोर्डले द्रविड यस कार्यकालमा टोलीसँग रहने जनाएको छ ।
यसअघि यो विश्वास गरिएको थियो कि द्रविड आफ्नो कार्यकाललाई निरन्तरता दिन चाहँदैनन् र भिभिएस लक्ष्मणलाई दक्षिण अफ्रिका भ्रमणको लागि प्रशिक्षकको रूपमा पठाउन सकिन्छ ।
बीसीसीआईका एक अधिकारीले समाचार एजेन्सी पीटीआईलाई भने – ‘बीसीसीआई सचिव जय शाहले गत हप्ता द्रविडसँग कुरा गरेका थिए । यो कुराकानीपछि द्रविडले प्रशिक्षकको रुपमा आफ्नो कार्यकाल लम्ब्याउन राजी भए ।’
राहुल नोभेम्बर २०२१ मा टीम इन्डियाको मुख्य प्रशिक्षक नियुक्त भएका थिए । द्रविडका नजिकका मानिसहरूले उनी आफ्नो सम्झौता लम्ब्याउन इच्छुक नभएको बताउँदै आएका थिए । उनले यसबारे बीसीसीआई अधिकारीहरूलाई जानकारी समेत गराएका थिए ।
द्रविडको दुई वर्षको कार्यकालमा टीम इन्डिया एकदिवसीय विश्वकपको फाइनलमा पुगेको थियो । फाइनलमा अस्ट्रेलियासँगको हार बाहेक, भारतले विश्वकपमा आफ्ना सबै खेल जितेको थियो । योसँगै विश्वकप अघि भारतले एसिया कप जितेको थियो । गत वर्ष अष्ट्रेलियामा भएको टी–२० विश्वकपमा भारतले सेमिफाइनल खेलेको थियो ।
यस बाहेक भारतले अष्ट्रेलिया, श्रीलंका र न्युजिल्याण्डविरुद्धको घरेलु टेष्ट सिरिज र बंगलादेशमा सिरिज जितेको थियो । साथै, भारतले वेस्ट इन्डिज, अष्ट्रेलिया, दक्षिण अफ्रिका, न्यूजिल्याण्ड र श्रीलंका विरुद्धको घरेलु टी–२० सिरिज जित्न सफल भएको थियो । तर, दक्षिण अफ्रिका भ्रमणमा टेष्ट र एकदिवसीय सिरिजमा पराजय बेहोरेको थियो । यसबाहेक इंग्ल्याण्डमा भएको पाँचौं टेस्टमा पनि भारत पराजित भएको थियो ।
