काठमाडौँ — नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल प्रचण्डले रामबहादुर थापालाई गृहमन्त्री बनाएर आफूले ठूलै गल्ती गरेको बताउनु भएको छ ।
प्रचण्डले रुकुममा आयोजित कार्यक्रममा बोल्दै पार्टीभित्र आफूलाई साथ दिएकालाई अवसर नदिई घेराबन्दी गर्नेलाई पार्टी र सरकारमा अवसर दिएकोमा अहिले आएर पछुतो लागेको पनि बताउनुभयो ।
प्रचण्डले २०७० सालको संविधानसभाको निर्वाचनमा आफूलाई नै बम प्रहार गर्नेलाई गृहमन्त्री बनाएको भन्दै आक्रोश पोख्नुभयो । उहाँले भन्नुभयो, पार्टीप्रति, लाइनप्रति इमानदार भएर लागेका, दुःख गरेका कार्यकर्ताहरूलाई मैले प्रत्येक नियुक्ति, पार्टीमा नियुक्ति गर्दा र मन्त्री बनाउँदा प्राथमिकता दिनुपर्नेमा अलिकति गल्ती गरेँ ।
पार्टीबाट सांसद भएर नेकपा (एमाले)मा लागेका चार मन्त्रीहरूलाई निष्कासनको पत्र संसद् सचिवालयलाई पार्टी अध्यक्षका तर्फबाट आजै दर्ता गराउनु भएको थियो । नेकपा माओवादीबाट निर्वाचित टोपबहादुर रायमाझी, लेखराज भट्ट, प्रभु साह र गौरीशंकर चौधरीलाई पार्टी सदस्यसमेत नरहने गरी सांसदबाट हटाउने माओवादी केन्द्रले निर्णय गरेको थियो ।
उहाँहरुलाई हटाउनु पर्ने कारणबारे प्रष्टीकरण दिँदै अध्यक्ष प्रचण्डले भन्नुभयो, फटाहा-फटाहा टाइपका मान्छेहरूलाई प्राथमिकता दिएको जस्तो भयो । आगामी दिनमा हिजो युद्ध र आन्दोलनमा इमानदारितासाथ लडेका जनता र कार्यकर्तालाई अगाडि बढाउने संकल्प गर्न चाहन्छु ।
प्रचण्डले संविधान र व्यवस्थामाथिको षड्यन्त्र नरोकिएको दाबी गर्दै भन्नुभयो, प्रतिनिधिसभा जोगियो तर षड्यन्त्र रोकिएको छैन । जनयुद्धबाट प्राप्त उपलब्धिमाथिको षड्यन्त्र रोकिएको छैन । समाजवाद उन्मुख संविधान खतरामा छ । संविधानविरुद्ध देशभित्र र बाहिरबाट अनेक खालका प्रपञ्च भइरहेका छन् । हामी त्यसका विरुद्ध लडिराखेका छौं ।
