काठमाडौं । सर्वोच्च अदालतले उच्च अदालत सुर्खेतका मुख्य न्यायाधीश नहकुल सुवेदीको योग्यता नपुगेको भन्दै परेको रिट खारेज गरिदिएको छ ।
सोमबार न्यायाधीश तेजबहादुर केसीको एकल इजलासले न्यायाधीशमा प्रस्तावित सुवेदीको योग्यताका सम्बन्धमा परेको रिट खारेज गरिदिएको हो ।
सर्वोच्चले रिट खारेज गरेसँगै सुवेदी सर्वोच्चको न्यायाधीश बन्ने बाटो खुलेको छ ।
संविधानअनुसार सर्वोच्च अदालतको न्यायाधीश हुन न्याय सेवाको राजपत्रांकित प्रथम श्रेणी वा सहसचिव स्तरको पदमा कम्तीमा १२ वर्ष काम गरेको हुनुपर्नेमा सुवेदीले राजपत्रांकित प्रथम श्रेणीको पदमा १० वर्ष ४ महिना १८ दिनमात्र काम गरेका थिए ।
सर्वोच्चले मुख्य न्यायाधीश पदलाई पनि राजपत्रांकित प्रथम श्रेणी वा त्यो भन्दा माथिल्लो पद मान्दैै सुवेदीको योग्यता पुगेको फैसला सुनाएको हो ।
सुवेदीको सिफारिसबारे वैशाख ३ गते संसदीय सुनुवाइ समितिले सुनुवाइ गर्ने बताइएको छ ।
