काठमाडौं । एसिया कप क्रिकेटअन्तर्गत समुहचरणको अन्तिम खेलमा नेपालले भारतलाई २३१ रनको लक्ष्य दिएको छ । श्रीलंकाको कान्डीमा रहेको पालेकेले इन्टरनेशनल क्रिकेट स्टेडियममा टस हारेर पहिला ब्याटिङ गरेको नेपाल ४८.२ ओभरमा अलआउट हुँदै २३० रन बनायो ।
नेपालका ओपनर तथा विकेटकिपर आसिफ शेखले ९७ बलमा ८ चौकासहित सर्वाधिक ५८ रन बनाए । अर्का ओपनर कुशल भुर्तेलले २५ बलमा ३ चौका र २ छक्कासहित ३८ रनमा आउट भए । पहिलो विकेटका लागि आसिफ शेख र कुशल भुर्तेलले ९.५ ओभरमा ६५ रनको साझेदारी गरेका थिए ।
नेपालका तिब्र गतिका बलर सोमपाल कामि एक चौका र २ छक्कासहित ४८ रन बनाएर अर्धशतकको मुखमा आउट भए । यस्तै, गुलशन झा ३५ बलमा ३ चौकासहित २३ रनमा आउट हुँदा दिपेन्द्र सिंह ऐरीले ३ चौकासहित २९ रन बनाए । भीम सार्की ७, कप्तान रोहित पौडेल ५, कुशल मल्ल २ र सन्दीप लामिछाने ९ रनमा आउट भए ।
भारतका लागि रविन्द्र जडेजा र मोहम्मद शिराजले समान ३ विकेट लिए । यस्तै, मोहम्मद शामी, शार्दुल ठाकुर र हार्दिक पान्ड्याले समान एक विकेट लिए ।
