काठमाडौँ । नेकपा (माओवादी केन्द्र)ले मध्यरातमा ‘रअ’ प्रमुखसँग बालुवाटारमा भेटेर पटकपटक संसद् विघटन गर्ने, जनताका मुद्दाहरुमा कानून बनाउन खोज्दा संसद् अवरोध गर्ने, भ्रष्टाचारीहरुको छानबिन र फाइल खोल्दा गैरजिम्मेबार बन्ने जस्ता पात्र र प्रवृत्तिले गर्दा प्राप्त राजनीतिक उपलब्धिहरुमाथि प्रहार भइरहेको तथ्य नेपाली जनताले बुझिसकेको बताएको छ ।
केही दिनअघि आफूलाई प्रधामनमन्त्री बनाउन सरदार प्रीतम सिंह धेरै पटक दिल्ली गएको भन्ने प्रधानमन्त्री पुष्पकमल दाहाल प्रचण्डको अभिव्यक्तिलाई लिएर एमालेले प्रतिनिधिसभा र राष्ट्रियसभाको बैठक अवरुद्ध गर्दै प्रधानमन्त्रीको राजीनामा मागेपछि माओवादी केन्द्रले एमालेलाई उक्त जवाफ दिएको हो ।
पार्टीका उपाध्यक्ष एवं प्रवक्ता कृष्णबहादुर महराले बिहीबार एक प्रेस विज्ञप्ति जारी गर्दै प्रधानमन्त्रीको सदाशयतालाई दुराशयमा बदल्न खोज्नु एमालेको गलत चाहना पूरा गर्ने अभिष्टताबाहेक केही नभएको बताउनुभएको छ ।
सरदार प्रितम सिंह र प्रधानमन्त्री प्रचण्डका बीचमा औपचारिक मात्र नभएर भावनात्मकरुपमा समेत प्रगाढ सम्बन्ध रहेको उहाँले विज्ञप्तिमा उल्लेख गर्नुभएको छ ।
लोकतन्त्रको अभ्यास गर्ने थलो संसद् समेत अवरोध गरिएकोप्रति आक्रोश व्यक्त गर्दै भन्नुभएको छ, “‘पानी धमिल्याएर माछा मार्न खोज्ने’ प्रवृत्ति फेरि पनि ‘के निउ पाऊँ, कनिका बुकाऊँ’ भने जस्तै भ्रामक र दुराशययुक्त प्रचारबाजीमा उत्रिएर गरिएका हर्कतप्रति भर्त्सना गर्दछ ।”
साथै उहाँले राष्ट्रियता, गणतन्त्र र जनजीविकाका पक्षमा दृढतापूर्वक उभिन पार्टीपङ्क्ति र जनसमुदायमा आह्वान गर्नुभएको छ ।
