काठमाडौ । नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले सरकारद्धारा प्रस्तुत बजेट समगम्रमा सकारात्मक र सन्तुलित नै रहेको प्रतिक्रिया दिनुभएको छ ।
प्रस्तुत बजेटबारे न्युजपोलारसँगको कुराकानीमा उहाँले भन्नुभयो– खासमा त देशको महामारीको अहिलेको अवस्था हेर्दा सरकारले स्वास्थ्य उपचार र स्वास्थ्य पूर्वाधारमा नै बजेटको प्राथमिकता हुनुपर्ने हो र त्यो देखिएको छ । अनि त्यसका अतिरिक्त अरु पनि निजी क्षेत्रले अघि सारेका धेरै कुराहरुलाई यो बजेटले सम्बोधन गर्न खोजेको मैले देखेको छु, जुन सकारात्मक नै देखिन्छ ।
“यो विषय परिस्थितिमा निजी क्षेत्र निकै समस्यामा रहेकोले यस क्षेत्रले सरकारसँग राखेका कतिपय मागहरु बजेटमा सम्बोधनको प्रयास भएको र तिनको कार्यान्वयन पक्ष अबका दिनमा बलियो हुनुपर्दछ– ढकालले भन्नुभयो,
वरिष्ठ उपाध्यक्ष ढकालले आन्तरिक पर्यटन प्रवद्र्धनका लागि दश दिन बिदा दिने, विदेशी पर्यटकलाई एक महिना सम्मका लागि प्रवेशाज्ञा निशुल्क गर्ने, आयात प्रातिस्थापनका कार्यक्रमलाई बढावा दिने, निर्यातका कार्यलाई सरकारले जोड दिने तथा कोभिड १९ का कारण प्रभावित रहेको निजी क्षेत्रलाई सहयोगका कार्यक्रमहरु ल्याउने प्रतिबद्धता सरकारले अघि सारेकोले बजेटका यी कार्यक्रमहरुलाई सकारात्मक रुपमा नै लिनुपर्ने उहाँले बताउनुभयो ।
उहाँले बजेट निर्माणका क्रममा सम्बोधन होस् भनेर निजी क्षेत्रहरुले दिएका कतिपय सुझावहरुलाई यो बजेटले सम्बोधन गर्ने प्रयास गरेको छ । उहाँले कोभिडका प्रभावित क्षेत्रलाई पनि सहयोगका कार्यक्रमहरु ल्याउने भनिएकोले यी कार्यक्रमहरु पनि प्रभावकारी रुपमा आउन् र समग्रमा यी सबै पक्षको सही कार्यान्वयन होस् भन्नेमा जोड दिनुभयो ।
