काठमाडौं: नेपालमा पछिल्लो समय इन्टरनेटमा आधारित भुक्तानी प्रणाली कारोबारमा व्यापक वृद्धि हुन थालेको पाइएको छ ।
नेपाल राष्ट्र बैंकले सार्वजनिक गरेको पछिल्लो विवरणमा, यही २०८० वैशाख महिनाभित्रमा मोबाइल बैंकिङ ग्राहकको संख्या २ करोड ७ लाख पुगेको छ । गत चैतमा यो संख्या २ करोड ४ लाख थियो । गत वर्ष बैशाखमा भने मोबाइल बैंकिङ ग्राहक एक करोड ७६ लाख थिए ।
कारोबारका दृष्टिबाट २०८० बैशाखको एक महिनाको अवधिमा करिब रु. २१ खर्ब बराबरको कारोबार भएको थियो । जबकी गत वर्ष २०७९ बैशाखमा रु. ११ खर्ब ३६ अर्ब थियो ।
यस्तै, क्युआर प्रविधिबाट हुने भुक्तानी पनि निरन्तर बढ्दै गएको छ । २०८० बैशाखमा मात्र रु. २६ अर्ब भुक्तानी भएको छ । त्यसैगरी, वालेट मार्फत बैशाखमा मात्र रु. १९ अर्ब २५ करोडको भुक्तानी भएको छ ।
राष्ट्र बैंकका अनुसार, २०८० बैशाख महिनासम्ममा देशभर विभिन्न वित्तीय संस्थाका ४ हजार ७१६ वटा एटिएम मेसिन रहेका, डेबिट कार्ड धारकको संख्या एक करोड १७ लाख ६० हजार, क्रेडिट कार्ड २ लाख ७४ हजार ६९०, प्रिपेड कार्ड एक लाख ३३ हजार, इन्टरनेट बैंकिङ ग्राहकको संख्या १८ लाख ३ हजार, ब्रान्चलेस बैंकिङ सेन्टर १ हजार ३५५, आरटिजिएसमा आबद्ध ४५, कनेक्ट आइपिएसका प्रयोगकर्ता १० लाख ६४ हजार, इसिसि सदस्य ५४ र आइपिएस सदस्य ११६ रहेको छ ।
