काठमाडौँ । प्रमुख तीन राजनीतिक दलका संसदीय दलका नेता र प्रमुख सचेतकहरुबीचको बैठकमा संसदीय सुनुवाइ समितिको नेतृत्व टुंग्याउने विषयमा सहमति भएको छ।
नेकपा -माओवादी केन्द्र_ का मुख्य सचेतक हितराज पाण्डेले प्रधानमन्त्री निवास बालुवाटारमा भएको छलफलमा चालु संसद् अधिवेशनलाई प्रभावकारी बनाउने र विभिन्न समितिहरू गठन गर्ने विषयमा केन्द्रित रहेको जानकारी दिनुभयो।
उहाँका अनुसार छलफल सकारात्मक छलफल भएको र संसद्लाई प्रभावकारी बनाउन समझदारीका साथ अगाडि बढ्ने विषयमा छलफल भएको छ ।
उहाँले संसद्का विषयगत समितिहरू गठन गर्ने विषयलाई टुंग्याउने समझदारी भएको बताउनुभयो । उहाँले भन्नुभयो, “सत्य निरूपणसम्बन्धी विधेयकलाई प्राथमिकता दिएर अगाडि बढाउनुपर्नेछ, संसदीय सुनुवाइ समितिसमेत गठन भइसकेको छैन। संसदीय सहमतिको नेतृत्व टुंग्याउने विषयमा एकमत छौँ। छिट्टै निष्कर्षमा पुग्छौँ ।”
मुख्य सचेतक पाण्डेका अनुसार सत्य निरूपण तथा मेलमिलाप सम्बन्धी विधेयकलाई छिटो टुंगोमा पुर्याउन संसदीय उपसमिति गठन गर्ने, संसदीय समितिहरूको नेतृत्व र प्रतिनिधित्व सहमतिका आधारमा गर्ने, संसदीय सुनुवाइ समिति गठन गर्ने लगायतका विषयमा छलफल भएको थियो।
बैठकमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा, नेकपा ९एमाले० का अध्यक्ष केपी शर्मा ओली, उपप्रधानमन्त्री एवं रक्षामन्त्री पूर्णबहादुर खड्का, माओवादी केन्द्रका मुख्य सचेतक पाण्डे, कांग्रेसका प्रमुख सचेतक रमेश लेखक तथा एमालेका संसदीय दलका उपनेता सुवास नेम्वाङ सहभागी हुनुहुन्थ्यो ।
