बुटवल । लुम्बिनी प्रदेशमा नेपाली कांग्रेसका प्रदेशसभा संसदीय दलका नेता डिल्लीबहादुर चौधरीले मुख्यमन्त्रीमा दाबी गर्नुभएको छ ।
सत्ता गठबन्धनबाट ५३ प्रदेशसभा सदस्यको हस्ताक्षरसहित चौधरीले प्रदेश प्रमुखसमक्ष मुख्यमन्त्रीमा दाबी पेश गर्नुभएको हो ।
प्रदेश प्रमुख अमिक शेरचनले संविधानको धारा १६८ को उपधारा २ बमोजिम दाबी पेस गर्न दिएको समयभित्र उहाँले दाबी पेश गर्नुभएको हो ।
लुम्बिनी प्रदेशका मुख्यमन्त्री लीला गिरीले विश्वासको मत पाउन नसकेपछि प्रदेश प्रमुख शेरचनले मुख्यमन्त्रीमा दाबी पेश गर्न आह्वान गर्नुभएको थियो ।
कांग्रेस र नेकपा (माओवादी केन्द्र)सहित ८ दल र एक स्वतन्त्र गरी ५३ सांसदहरूले मुख्यमन्त्री लीला गिरी अल्पमतमा परेको भन्दै चौधरीलाई संविधानको धारा १६८ (२)अनुसार मुख्यमन्त्री नियुक्त गर्न प्रदेश प्रमुख अमिक शेरचनसमक्ष निवेदन दिएका थिए । बिहीबार पनि ५३ जनाको हस्ताक्षरसहित दाबी पेश भएको छ ।
लुम्बिनी प्रदेशसभा ८७ सदस्यी छ । नेकपा (एमाले) २९, कांग्रेस २७, माओवादी केन्द्र ११, राष्ट्रिय प्रजातन्त्र पार्टी (राप्रपा) र नागरिक उन्मुक्ति पार्टीका ४÷४, जनमत पार्टी, जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) का ३÷३, राष्ट्रिय जनमोर्चा र नेकपा (एकीकृत समाजवादी) का १÷१ र स्वतन्त्र १ जना सदस्य रहेका छन् ।
प्रदेशमा सरकार गठनका लागि ४४ प्रदेशसभाको आवश्यकता पर्दछ ।
तस्बिरः सुमित्रा अधिकारी-रासस
