कलैया । जनता समाजवादी पार्टी (जसपा) का अध्यक्ष उपेन्द्र यादवले बारा–२ मा प्रतिनिधिसभा सदस्यका लागि हुने उपनिर्वाचनमा मनोनयन दर्ता गराउनुभएको छ ।
आगामी वैशाख १० गते हुने उपनिर्वाचनमा समर्थकहरुसहित उहाँले कलैयास्थित जिल्ला समन्वय समितिको कार्यालयमा स्थापना गरिएको मुख्य निर्वाचन अधिकृतको कार्यालयमा पुगेर मनोनयन दर्ता गराउनुभएको हो ।
मनोनयन दर्ता गर्नुअघि उहाँले सञ्चारकर्मीहरुसँग बाराको जनताले बोलाएपछि उनीहरुको सम्मानमा चुनाव लड्न आएको बताउनुभयो ।
यादव गत मंसिरको चुनावमा सप्तरी २ मा जनमत पार्टीका अध्यक्ष सिके राउतसँग पराजित हुनुभएको थियो ।
बारा–२ बाट निर्वाचित जसपाकै रामसहायप्रसाद यादव उपराष्ट्रपति भएपछि उक्त निर्वाचन क्षेत्र रिक्त रहेको छ ।
