काठमाडौँ । प्रधानमन्त्री निवास बालुवाटारअगाडि धर्ना दिएका मिटरब्याज पीडितहरुले आफ्ना कुरा प्रधानमन्त्री पुष्पकमल दाहाललाई सुुनाउन चाहेको बताएका छन् ।
आन्दोलनरत मिटरब्याज पीडितलाई मंगलबार बिहान भेट्न पुगेका गृह मन्त्रालयका सहसचिव केदारनाथ शर्मालाई उनीहरुले प्रधानमन्त्रीसँग भेटेरै आफ्ना कुरा राख्ने अडान लिएका थिए ।
पीडितहरुलाई भेट्न काठामाडौँका प्रमुख जिल्ला अधिकारी घनश्याम उपाध्याय पनि सहसचिव शर्मासँगै पुग्नुभएको थियो । शर्माले पीडितहरुको समस्या यथाशीघ्र समाधान गर्ने आश्वासन दिँदै आन्दोलन फिर्ता लिन आग्रह गर्नुभएको थियो ।
पीडितहरुले प्रधानमन्त्रीसँगै आफ्ना कुरा राख्ने अडान लिएपछि सहसचिव शर्माले प्रधानमन्त्रीसँग भेट्ने समय मिलाउने आश्वासन दिनुभएको थियो ।
एघार दिन हिँडेर मिटरब्याज पीडितहरु आइतबार काठमाडौँ आइपुगेका हुन् । उनीहरु आइतबार मातातीर्थमा बसेका थिए र सोमबार राति खुलामञ्चमा बस्न खोजेका थिए । तर काठमाडौँ महानगरपालिकाले खुलामञ्चमा बस्न नदिएपछि उनीहरु सडक किनारामै रात बिताएर मंगलबार बिहान बालुवाटार प्रस्थान गरेका हुन् ।
