काठमाडौं । नेकपा (एकीकृत समाजवादी) का अध्यक्ष माधव नेपालले आफूले चाहेको भए राजनीतिक कोर्स परिवर्तन गरेर भएपनि राष्ट्रपति हुनसक्ने तर बन्न नचाहेको बताउनुभएको छ ।
पार्टीनिकट भूपू सैनिक तथा प्रहरीको बैठकमा उहाँले कांग्रेस र माओवादीलाई धोका दिएर राष्ट्रपति बन्न नचाहेको बताउनुभयो । सत्ता गठबन्धनमा आफ्नो पार्टी निर्णायक भूमिकामा रहेको उहाँको भनाइ थियो ।
“हामीले चाहेको भए कोर्स चेञ्ज गरेर राष्ट्रपति बन्नसक्थ्यौँ । तर, के हुन्थ्यो थाहा छैन । एकीकृत समाजवादी र माधव नेपाल धोकेबाज होइन । कांग्रेस र माओवादीलाई पनि धोका दियो भन्ने हुन्थ्यो । इज्जत र प्रतिष्ठाभन्दा ठूलो केही छैन । राष्ट्रपति पाउनु कुनै ठूलो कुरा थिएन । मैले धोका दिने ढंगले अघि बढ्न चाहिनँ”, उहाँले भन्नुभयो ।
आफ्नो पार्टीले गठबन्धनमा सम्मानजनक भूमिका पाउने उल्लेख गर्दै अध्यक्ष नेपालले भन्नुभयो, “मैले अस्तिको मिटिङमा भनेको थिए । ख्याल रहोस् । अहिले गठबन्धनमा १० वटा छ । म प्रधानमन्त्री भएको बेलामा २२ वटा पार्टीलाई एकताबद्ध बनाएर प्रधानमन्त्री भएको मान्छे । अहिले १० वटा पार्टी हुँदैमा आत्तिनुपर्ने छैन । साथ दिनेहरूलाई मिलाएर लाने हो ।”
नेकपा ९एमाले० का अध्यक्ष केपी शर्मा ओलीको अहंकारप्रति लक्षित गर्दै उहाँले त्यो अहंकारले गर्दा सबैलाई बेवास्ता भएको र प्रचण्ड प्रधानमन्त्री हुने अवस्था बनेको बताउनुभयो ।
