काठमाडौँ । निर्वाचन आयोगले आजबाट उपनिर्वाचनका लागि दल दर्ताको आह्वान गरेको छ ।
वैशाख १० गते हुन गइरहेको उपनिर्वाचनको लागि चैत ८ देखि चैत १२ गतेसम्मको समय सीमा तोकेर आयोगले आजबाट दल दर्ता सुरु गरेको हो ।
चितवन–२, बारा–२ र तनहुँ–१ मा वैशाख १० गते उपनिर्वाचन हुदैँछ । गत मंसिर ४ को निर्वाचनमा राष्ट्रिय स्वतन्त्र पार्टीका सभापति रवि लामिछाने चितवन–२ बाट निर्वाचित भएका थिए । तर लामिछानेको नागरिकतासम्बन्धी मुद्दामा सर्वोच्चले पद बदर गरेपछि चितवन–२ रिक्त हुन पुगेको थियो ।
यसैगरी, तनहुँ–१ वाट निर्वाचित नेपाली कांग्रेसका वरिष्ठ नेता रामचन्द्र पौडेल राष्ट्रपति र बारा–२ का जसपाका रामसहायप्रसाद यादव उपराष्ट्रपतिमा निर्वाचित भएपछि दुवै ठाउँमा पदरिक्त भएको थियो । सोही रिक्त स्थानमा पदपूर्तिका लागि निर्वाचन आयोगले वैशाख १० गते उपनिर्वाचन गराउन लागेको हो ।
