काठमाडौं । आइसिसी विश्वकप लिग–टू त्रिकोणात्मक ओडिआई सिरिजमा नेपालले सानदार प्रदर्शन गर्यो । अविश्वसनीय प्रदर्शन गर्दै सिरिजको छौठौँ स्थानमा रहेको नेपाल तेस्रो स्थानमा उक्लििदै सोझै विश्वकप छनोटमा स्थान बनायो । नेपालले पछिल्ला १२ मध्य ११ खेल जित्दै ओडिआई मान्यता बचाउदै विश्वकप छनोटमा पुग्यो । नेपालको यो सानदार प्रदर्शनमा बलरहरुको भुमिका उल्लेखनिय रह्यो ।
लिग–टू मा नेपालबाट स्पिनर सन्दीप लामिछाने सर्वाधिक विकेट लिने खेलाडी बने । उनले ३१ खेलमा २८२ ओभर बलिङ गर्दा १ हजार १ सय ४२ रन खर्चेर कुल ७२ विकेट लिए । उनले यस सिरीजमा पाँच पटक चार विकेट र दुई पटक पाँच विकेट लिए । यससँगै उनी लिग–टू मा सर्वाधिक विकेट लिने सूचिमा दोस्रो स्थानमा रहे । ओमानका बिलाल खान ३५ खेलमा ७६ विकेट लिँदै शीर्ष स्थानमा छन् ।
लिग टू मा नेपालका तीव्र गतिका बलर करण केसीले पनि सानदार प्रदर्शन गरे । उनले ३० खेलमा २१५.५ ओभरमा १ हजार १ सय ३ रन खर्चेर ५० विकेट लिए । उनले नेपालको लागि लिग–२ मा तीन पटक पाँच विकेट लिए । यससँगै उनी लिग–टू मा सर्वाधिक विकेट लिने खेलाडीको सूचिमा छैटौं स्थानमा छन् भने नेपालबाट दोस्रोमा छन्।
नेपालका प्रमुख तीव्र गतिका बलर सोमपाल कामीले लिग २ मा ३६ विकेट लिए । यससँगै उनी नेपालबाट सर्वाधिक विकेट लिने खेलाडीको सुचिमा तेस्रो स्थानमा रहे। उनले ३१ खेलमा २२८.३ ओभर बलिङ गर्दै कुल १ हजार १ सय ११ रन खर्चेर ३६ विकेट लिए । लिग टू मा भने सोमपाल १६ औं नम्बरमा छन् ।
अलराउन्डर दीपेन्द्रसिंह ऐरीले लिग–टू मा ब्याटिङमा खासै राम्रो गर्न सकेनन् । यद्यपी उनको बलिङ र फिल्डिङ भने उत्कृष्ट रह्यो । ऐरीले १९४.२ ओभर बलिङ गर्दै ७ सय ३३ रन खर्चेर २३ विकेट लिए । नेपालको लागि उनी चौथो स्थानमा रहे ।
बायाँ हाते स्पिनर कुशल मल्लले लिग–टू मा नेपालको लागि १६ विकेट लिए । उनले १८ खेलमा १ सय १० ओभर बलिङ गर्दै कुल ५ सय २ रन खर्चे । नेपालले कुशललाई पार्टटाइम स्पिनरको रुपमा प्रयोग गरेको थियो । जसबाट उनले राम्रो सदुपयोग गरे र उनी नेपालबाट सर्वाधिक विकेट लिने खेलाडीमा पाचौँमा परे ।
