काठमाडौँ । अन्तर्राष्ट्रिय विकासका लागि अमेरिकी नियोग (युएसएआइडी) की प्रमुख सामन्था पावरले सानोठिमीस्थित आदर्श मावि पुगेर त्यहाँका छात्राहरुसँग बास्केटबल खेल्नुभएको छ ।
जर्सी लगाएर केहीबेर बास्केटबल खेल्नुभएकी पावरले विद्यार्थीहरुबाट उनीहरुको भविष्यका योजना र लक्ष्यहरुबारे प्रत्यक्षरुपमा सुन्नुभएको नेपालस्थित अमेरिकी राजदूतावासले जनाएको छ ।
दूतावासका अनुसार २०७२ सालको भूकम्पमा ध्वस्त भएको उक्त विद्यालय पुनर्निर्माण गर्न र त्यहाँ पढ्न सक्ने विद्यार्थीहरूको सङ्ख्या दोब्बर बनाउन युएसएआइडीले स्थानीय समुदायसँग साझेदारी गरेको थियो ।
अमेरिकाको राष्ट्रिय सुरक्षा परिषद्को सदस्यसमेत रहनुभएकी उहाँ आजै नेपाल आइपुग्नुभएको हो । उहाँ अमेरिकाको क्याबिनेटस्तरकी उच्च अधिकारी हुनुहुन्छ ।
नेपालमा रहँदा उहाँले प्रधानमन्त्री पुष्पकमल दाहाल प्रचण्ड, उपप्रधानमन्त्री एवं अर्थमन्त्री विष्णु पौडेल, परराष्ट्रमन्त्री विमला राई पौड्याल, नागरिक समाजका व्यक्तित्व, सामुदायिक समूहहरु र व्यवसायहीहरुसँग भेट गर्ने कार्यक्रम छ ।
