धरान । धरान उपमहानगरपालिकाले पनि सार्वजनिक जग्गामा अतिक्रमण गरेर बनाइएका संरचना भत्काउनका लागि डोजर चलाउन सुरू गरेको छ ।
वडा नं. ५ देउरालीमा आईतबार बिहान खोलाको सार्वजनिक जग्गा अतिक्रमण गरेर निर्माण गरिएको घर भत्काइएको हो ।
धरान ५ को खार खोला र अधेरी खोलाको सङ्गम स्थल धरान उपमहानगरपालिकाले बहुजातिय रङ्गशाला बनाउने निर्णय गरेको क्षेत्रमा एक तले पक्की घर निर्माण गरिएको थियो ।
सार्वजनिक जग्गा अतिक्रमण गरी घर निर्माण गरिएको भन्दै धरान उपमहानगरपालिकाले पटक पटक नबनाउन भन्दै आग्रह गर्दै पत्राचार समेत गर्दा पनि अटेर गरी घर निर्माण सम्पन्न भएको थियो ।
मुना चौधरी लिम्बुले सार्वजनिक जग्गा अतिक्रमण गरी एक तले पक्की घर निर्माण गरेको भन्दै नगरपालिकाले आज बिहान ठुलो सङ्ख्यामा सुरक्षाकर्मी परिचालन गरी डोजर लगाएर घर भत्काएको हो ।
घर भत्काउने क्रममा दोहोरो झडप समेत भएको थियो । दोहोरो झडप हुँदा धरान उपमहानगरपालिकाको डोजरमा क्षति पुगेको छ । डोजरको सिसा फुटेका छन् भने केही सामान्य घाइते भएका छन् ।
पछिल्लो समय धरानमा सार्वजनिक जग्गा अतिक्रमण गर्ने कार्य तीव्र गतिमा बढिरहेको अवस्थामा धरान उपमहानगरपालिका पनि एक्सनमा उत्रिएको हो ।
