काठमाडौं । नेकपा एमाले स्थायी समितिको बैठक रोकेर एकता प्रक्रिया अघि बढाउन आग्रह गर्न पुगेका नेता माधब नेपाल पक्षका नेताहरु आफ्ना कुरा राखेर फर्किएका छन् । ललितपुरस्थित तुलसीलाल अमात्य प्रतिष्ठानमा बसिरहेको स्थायी समितिको बैठकमा नेपाल पक्षका नेताहरु भीम रावल , सुरेन्द्र पाण्डे, घनश्याम भुसाल, गोकर्ण विष्ट र भीम आचार्य पुग्नुभएको थियो ।
उहाँहरु समेत रहेको कार्यदलले १० बुदे सहमति गरेर एकताको सन्देश दिने प्रयास गरेपनि नेता नेपालले शेरबहादुर देउवालाई दिएको साथ र समर्थन फिर्ता नलिने अडान राखेपछि सहमति अलपत्र परेको छ । बैठक स्थलमा नै अध्यक्ष ओलीको अनुमति लिएर नेता रावलले आफ्ना भनाईहरु राख्नु भएको थियो ।
नेता रावलले कार्यदलले काम गरिरहेको कारण बैठक रोकेर पार्टी एकता जोगाउन अध्यक्ष ओलीलाई आग्रह गर्नुभएको थियो । जवाफमा अध्यक्ष ओलीले बैठक कार्यसूची अनुसार नै अघि बढ्ने बताउनु भएको थियो । आफनो समूहको भनाई राखेर रावलको टोली फर्किएको छ । बैठकस्थलबाट बाहिरिने क्रममा उपाध्यक्ष भीम रावलले एमाले एकता प्रक्रिया थप जटिल बन्दै गएको प्रतिक्रिया दिनुभयो ।