बारम्बार नेपाली कांग्रेसको विश्वास माथि लात हानेका अस्थिर र अनैतिक राजनीतिका चतुर खेलाडी प्रचण्डलाई कांग्रेसले लत्रिएर विश्वासको मत दिनु भनेको कांग्रेसले सत्ताको आगाडि शिर झुकाउनु र लोकतान्त्रिक मूल्यमान्यताको अवमूल्यन गर्नु हो।
कांग्रेससँग गठबन्धन गरेर चुनाव जित्ने अनि आफैंले प्रतिगामीका मतियार भनेका केपी ओलीसँग घाँटी जोडेर कुर्चिको लागि सबै कुरालाई तिलाञ्जली दिने प्रचण्डको छेपारो प्रवृत्तिलाई सजाय दिनुको साटो झन मलजल गर्ने कुरा कांग्रेसका कार्यकर्ताको भावना विपरीत छ।
जुन सरकार कांग्रेसकै बिरुद्ध अस्वाभाविक, अनैतिक र आश्चर्यजनक रुपमा रातारात माले, मसाले, मण्डले र घण्टीसण्टि मिलेर बनेको छ त्यही सरकारलाई विश्वासको मत दिनु भनेको अपराधीलाई पुरस्कार दिए जस्तो हो।
जसले विश्वासघात गर्यो उसैलाई विश्वासको मत दिनु लाचारी र आत्मसमर्पण जस्तै हो। केही व्यक्तिहरुको निहीत सत्ता स्वार्थको लागि कांग्रेसको इतिहास समाप्त पार्न खोज्ने यो फोहोरी राजनीति खेदजनक छ। वर्तमानमा कांग्रेसले सरकारतिर फर्किएर र्याल चुहाउने भन्दा पनि गाउँतिर फर्किएर जनताको सुख दु:खमा साथ दिनु पर्छ।
वास्तवमा नेपाली कांग्रेसका लागि सशक्त प्रतिपक्षको भूमिका नै आजको वास्तविकता हो। तर सरकारालाई विश्वासको मत दिनु भनेको यो सरकार ठीक छ भनेर पक्ष लिनु हो। प्रतिपक्ष भनेको सरकार प्रति हामो विश्वास छैन भनेर खबरदारी गर्नु हो। तर यहाँ हास्यास्पद रुपमा यो सरकार ठीक छ भनेर विश्वासको मत जाहेर गरिसके पछि अब के आधारमा प्रतिपक्ष भन्न मिल्छ ?
-शाही नेपाली कांग्रेसका नेता हुनुहुन्छ ।
