काठमाडौँ । पानी भनेर स्पिरिट खाँदा सिरहाको मिर्चैया नगरपालिका–६ मा एक छात्राको मृत्यु भएको छ । सगरमाथा उच्च माविमा अध्ययनरत १६ वर्षीया सिर्जनाकुमारी महराको स्पिरिट सेवनले मृत्यु भएको हो ।
सिरहा नगरपालिका–११ भलुवाही बस्ने धर्मेन्द्रकी छोरी सिर्जनाकुमारीको शनिबार राति साढे १० बजे कर्जन्हास्थित फुलकुमारी महतो मेमोरियल अस्पतालमा मृत्यु भएको हो । शुक्रबार विद्यालय गएकी सिर्जनाकुमारी पेट दुखेपछि सिटामोल खान पानी सोचेर स्पिरिट खाँदा बिरामी परेकी थिइन् । तत्कालै उनलाई उपचारका लागि फुलकुमारी अस्पताल लगिएको थियो ।
सिर्जनाकुमारीलाई पानी सोचेर शिक्षिकाले स्पिरिट दिएको भन्दै उनको परिवार, विद्यार्थी र स्थानीयबासिन्दा आन्दोलनमा उत्रिएका छन् । प्रहरीले स्पिरिट दिने शिक्षिकालाई नियन्त्रण्मा लिएर सोधपुछ गरिरहेको बताइएको छ ।
आन्दोलनकारीहरुले भने शिक्षिकालाई कारबाहीको माग गरिरहेका छन् । विद्यार्थीहरुले विरोधमा सडकमा टायर बालेका छन् । उनीहरुले विद्यालयमा ढुंगामुढासमेत गरेका छन् ।
