काठमाडौं । मंसिर ४ गते भएको प्रतिनिधिसभा तथा प्रदेशसभा निर्वाचनको प्रतिनिधिसभातर्फ ६ स्थानको नतिजा आउँन अझै बाँकी रहेको छ ।
प्रतिनिधिसभाको १६५ निर्वाचन क्षेत्रमध्ये कहीँ गणना बीचमा रोकिएको छ भने केही ठाउँमा धेरै मत गन्नुपर्ने भएकाले समय लाग्ने बताइएको छ । दोलखा, स्याङ्जा, बाजुरामा भने अझै गणना सुरू भएको छैन ।
इलाम १ मा अझै १२ हजार ११९ मत गन्न बाँकी रहेको छ । हालसम्म यहाँ एमालेका महेश बस्नेत अग्र स्थानमा रहेका छन् । शनिबार यस क्षेत्रमा धाँधली भएको भन्दै पुनस् मतदानको माग गरेपछि विवाद बढेको थियो ।
उदयपुर १ मा नेपाली कांग्रेसका नारायण खड्काले १७१३ ले मतान्तर बढाउदै अग्रता कायम राखेका छन् । खड्काले २१ हजार ८३३ मत ल्याउँदा एमालेकी मञ्जुकुमारी चौधरी २० हजार १२० मत ल्याएर पछ्याइरहेकी छन् ।
त्यस्तै, सुनसरी १ मा राष्ट्रिय स्वतन्त्र पार्टीकी गोमा तामाङ १३ हजार ११७ मत ल्याएर अग्रस्थानमा रहेकी छन्। जसपाका अशोककुमार राईले १२ हजार ७०७ र माओवादीका मुक्सामहाङ्ग सुब्बाले १० हजार ११६ मत ल्याएका छन् ।
सुनसरीको क्षेत्र नम्बर ३ मा एमालेकी भगवती चौधरीले २२ हजार ८४२ मतसहित लिड गरिरहेकी छन् । कांग्रेसका विजयकुमार गच्छदार १८ हजार २६७ मतका साथ पछ्याइरहेका छन् ।
विवादपछि रोकिएको सुनसरी ४को गणना भने १७ घण्टा बित्दासम्म सुरू भएको छैन । अहिले यहाँ सर्वदलीय बैठक बसिरहेको छ । कांग्रेस उम्मेदवार सञ्चारमन्त्री कार्कीले धाँधली भएको भन्दै पुनः मतगणनाको माग गरेपछि यहाँ विवाद भएको थियो ।
मधेसको धनुषा ४ मा नेपाली कांग्रेसका महेन्द्र यादव १०२१ मतले अगाडि छन् । उनलाई नेकपा एमालेका सचिव रघुवीर महासेठले पछ्याइरहेका छन् । ५५ हजार मत गणना गर्दा यादवले २१ हजार २२४ र महासेठले २० हजार २०३ मत पाएका छन् ।
