काठमाडौँ । नेकपा एमालेका नेता खिमलाल भट्टराईले राष्ट्रिय सभा सदस्य पदबाट दिएको राजीनामा स्वीकृत भएको छ ।
भट्टराईको राजीनामा स्वीकृत भएको र उनको पद खाली भएको संसद् सचिवालयले मंगलवार सूचना प्रकाशित गरेको छ । भट्टराई राष्ट्रिय सभामा एमाले संसदीय दलका नेता थिए ।
भट्टराईले प्रतिनिधि सभा सदस्य पदमा उम्मेदवारी दिनका लागि राजीनामा दिएका थिए । यद्यपि, उनको उम्मेदवारी पार्टीको तर्फबाट कायम हुन भने सकेन । उनले रुपन्देही ५ बाट प्रतिनिधि सभातर्फ उम्मेदवारी दर्ता गराएका थिए ।
सोही क्षेत्रबाट एमालेका तर्फबाट बासुदेव घिमिरेले उम्मेदवारी दर्ता गराएका थिए । रुपन्देही ५ मा एमालेका दुई जनाको उम्मेदवारी परेपछि निर्वाचन आयोगले बासुदेव घिमिरेलाई एमालेको आधिकारिक उम्मेदवारको मान्यता दिएको थियो ।
यो पनि पढ्नुहोस्ः रुपन्देही ५ मा एमाले उम्मेदवार घिमिरेलाई आधिकारिकता, खिमलालको सांसद् पद पनि गुम्यो
