काठमाडौँ । राष्ट्रिय प्रजातन्त्र पार्टी (राप्रपा) विवेकशील साझा पार्टीका पूर्वअध्यक्ष रवीन्द्र मिश्रलाई पार्टीको वरिष्ठ उपाध्यक्ष पद दिन तयार भएको छ ।
राप्रपाको बिहीबार बसेको कार्यसम्पादन समितिको बैठकमा राप्रपा अध्यक्ष राजेन्द्र लिङ्देनले मिश्रसँग भएको छलफलबारे जानकारी गराउँदै मिश्रलाई वरिष्ठ उपाध्यक्ष पद दिएर भए पनि पार्टीमा ल्याउनुपर्ने प्रस्ताव गर्नुभएको बताइएको छ ।
राप्रपा उपाध्यक्ष बुद्धिमान तामाङले मिश्रलाई पार्टीमा वरिष्ठ उपाध्यक्ष पद दिन आफू बाधक नभएको तर बाहिर आफू बाधक भएको भनेर गरिएको प्रचारप्रति असन्तुष्टि जनाउनुभएको थियो ।
उपाध्यक्षत्रय तामाङ, धु्रवबहादुर प्रधान र रोशन कार्कीले पार्टीमा २०÷३० वर्षदेखि काम गर्दै आएका नेता तथा कार्यकर्ताको मानमर्दन गर्न नहुने बताउनुभयो ।
यद्यपि सल्लाहकार परिषद्का अध्यक्ष निरञ्जन थापाले भने निर्वाचित उपाध्यक्षहरुभन्दा तल रहने गरी मिश्रलाई पार्टीमा ल्याउन सुझाव दिनुभएको थियो । पार्टीमा अहिले निर्वाचित उपाध्यक्षमा तामाङ, विक्रम पाण्डे, प्रधान र कार्की रहनुभएको छ ।
पार्टी अध्यक्ष लिङ्देनसँग पार्टी अध्यक्षपछिको पहिलो वरियता पाउनुपर्ने मिश्रले माग गरेको बताइएको छ । मिश्र पार्टीमा आउने पक्का भएको अवस्थामा सबैको सम्मान हुनेगरी वरियता मिलाउन पार्टी अध्यक्षलाई जिम्मेबारी दिइएको बताइएको छ ।
