काठमाडौं । नेकपा एमालेका उपाध्यक्ष तथा पूर्वअर्थमन्त्री विष्णु पौडेलले एमालेका विरूद्ध एक्लै आफ्नो खुट्टामा उभिने आँट कुनै दलमा नभएको बताउनु भएको छ ।
प्रेस चौतारी नेपाल रूपन्देहीले शनिबार बुटवलमा आयोजना गरेको प्रशिक्षण कार्यक्रममा बोल्दै नेता पौडेलले आफ्नो मात्रै खुट्टामा टेकेर चुनाव लड्ने पार्टी एमालेमात्र भएको बताउनु भयो । नेता पौडेलले भन्नुभयो ‘एमालेसँग एक्लै चुनावमा भिड्ने आँट नेपालका कुनै पनि राजनीतिक दलसँग छैन ।’
उहाँले अदालतको दुरूपयोग गर्दै संवैधानिक ‘कू’ गरेर र एमालेका विरूद्ध सबै दलहरूको अपवित्र गठबन्धन गर्दा पनि स्थानीय तहको निर्वाचनमा मतको आधारमा एमाले पहिलो पार्टी बनेको बताउनु भयो ।
नेता पौडेलले गठबन्धनको वैशाखी समेत संकटतर्फ धकेलिएको उल्लेख गर्दे आगामी निर्वाचन पछि एमालले ठुलोदलका रुपमा सरकारको नेतृत्व गर्ने दाबी गर्नुभयो ।
नेता पौडेलले गठबन्धनले एमालेविरूद्ध विभिन्न झूटा भ्रमहरू सिर्जना गरेको भन्दै त्यस्ता भ्रमहरूलाई चिर्न प्रचार कार्यकर्ताहरूलाई निर्देशन दिनुभयो ।
