काठमाडौँ । नेपाली कांग्रेसका महामन्त्री गगन थापाले केही दिनदेखि काठमाडौँको फोहोर उठ्न थालेको भन्दै अब पुनः समस्या नबल्झियोस् भन्नका लागि निरन्तर सहजीकरण र अनुगमन आवश्यक रहेको बताउनुभएको छ ।
सामाजिक सञ्जाल फेसबुकमा उहाँले फाहोर व्यवस्थापनका सन्दर्भमा काठमाडौँ महानगरपालिकाले गर्नुपर्ने काम निरन्तर गररहेको उल्लेख गर्नुभएको छ ।
उहाँले काठमाडौँ उपत्यकाको फोहोर व्यवस्थापनका लागि संघीय सरकारले गर्नुपर्ने काम तोकिएकै समयमा हुन सकोस् र दीर्घकालीन हल खोज्न सकियोस् भन्नका लागि सोमबार सहरी विकास मन्त्रीको समन्वयमा बैठक बसेको जानकारी दिनुभयो ।
उहाँका अनुसार बैठकले काठमाडौँ, नुवाकोट र धादिङका प्रतिनिधिसभा सदस्यहरू सम्मिलित सहजीकरण तथा अनुगमन समिति बनाउने निर्णय गरेको छ।
समितिले सम्झौताबमोजिमका कामहरू समयमा गर्न तिनै तहका सरकार र निकायहरूसँग समन्वय र सहजीकरण गर्ने उहाँले जानकारी दिनुभयो ।
