काठमाडौँ । सत्ता गठबन्धनका शीर्ष नेताहरूको बैठक प्रधानमन्त्रीको सरकारी निवास बालुवाटारमा जारी छ । जारी बैठकमा मंसिर ४ गते निर्धारित प्रदेश र प्रतिनिधि सभा सदस्य निर्वाचनबारे छलफल भइरहेको बताइएको छ ।
यसअघि बसेको सत्ता गठबन्धनका शीर्ष नेताहरुको बैठकले सिट बाँडफाँट चाँडै टुंगो लगाउन कार्यदललाई निर्देशन दिएको थियो । कार्यदललाई प्रस्ताव ल्याउन दिइएको समयसीमा आजसम्म मात्र छ ।
२० साउनमा बसेको पाँच दलीय गठबन्धनका शीर्ष नेताहरुको बैठकले प्रदेश र प्रतिनिधिसभा चुनावमा तालमेल गर्ने निर्णय गर्दै कार्यदल गठन गरेको थियो । नेपाली कांग्रेसका पूर्वमहामन्त्री कृष्णप्रसाद सिटौला संयोजक रहेको ११ सदस्यीय कार्यदल गठन गरिएको छ । सिट बाँडफाँटको प्रस्ताव ल्याउने जिम्मा संयोजक सिटौलालाई नै दिइएको छ ।
