काठमाडौँ । नेपाल आयल निगमले सहमति पालना नगरेको भन्दै पेट्रोलियम ढुवानी व्यवसायीले फेरि आन्दोलन घोषणा गरेका छन् ।
पेट्रोलियम ढुवानी महासंघले गत २१ साउनदेखि पेट्रोलियम ढुवानी रोक्नेसहितको आन्दोलन घोषणा गरेको थियो । तर गत साउन १५ गते निगमले लिखित पत्र पठाएर भाडा वृद्धि गर्ने जानकारी गराए पनि त्यसको पालना नभएकाले घोषित आन्दोलन फिर्ता लिएर महासंघले पुनः आन्दोलन घोषणा गरेको हो ।
महासंघले एक विज्ञप्ति जारी गर्दै आगामी भदौ १ गतेसम्म ढुवानी भाडा वृद्धि नगरिए भदौ २ गतेदेखि अग्रिम ढुवानी अनुमति नलिने र अन्य आन्दोलनका कार्यक्रम गर्ने जनाएको छ । महासंघले हालको ढुवानी भाडामा ट्रक र ट्यांकर चलाउन नसकिने भन्दै सम्पूर्ण खर्च गर्नेगरी निगम आफैंलाई ट्यांकर चलाउन पनि आग्रह गरेको छ ।
गत वर्षदेखि नै बढेको इन्धनको मूल्यअनुसार ढुवानी नबढेको भन्दै ट्रक ट्यांकर व्यवसायीहरु आन्दोलित छन् । निगमले गत वर्ष नै भाडा बढाउनेबारे विज्ञ समूहमार्फत अध्ययन गराएको थियो । यद्यपि व्यापार निश्चित भएको क्षेत्रमा अधिक भाडादर समिमितले निर्धारण गरेपछि तत्कालीन निगम नेतृत्व भाडा समायोजन गरेको थिएन ।
