बागलुङ्ग । जिल्लाको प्रतिष्ठित कालिका मन्दिरको परिसरमा रहेको पार्किङ्गबाट प्राप्त हुने रकम मानवसेवा आश्रमले सदुपयोग गर्ने भएको छ ।
कालिका भगवती गुठी व्यवस्थापन समिति र मानवसेवा आश्रमबीच मन्दिर परिसरमा रहेको पार्किङ्गलाई व्यवस्थित बनाइ त्यसबाट प्राप्त रकम मानवसेवा आश्रमको संरक्षणमा रहेका सहयोगापेक्षी बेसहारा सडकमानवहरूको व्यवस्थापनका लागि प्रयोग गर्ने गरि सम्झौता पत्रमा हस्ताक्षर गरिएको छ । सम्झौता पत्रमा कालिका भगवती गुठी व्यवस्थापन समितिको तर्फबाट समितिका अध्यक्ष कुमार खड्का र मानव सेवा आश्रमका तर्फबाट संस्थाका बागलुङ्ग जिल्ला संयोजक बिपना तामाङ्गले हस्ताक्षर गरेका छन् ।
यस कार्यका लागि समितिले जग्गा उपलब्ध गराउने छ । मानवसेवा आश्रमले सम्पूर्ण व्यवस्थापकीय कर्तब्य पुरा गर्नेछ ।
समितिले पार्किङ्ग शुल्क समेत निर्धारण गरेको छ । दुई पांग्रे साधनको लागि रु. ५, माइक्रो, कार, जिप, भ्यानको लागि रु. १० र बसको लागि रु. २० निर्धारण भएको छ ।
मानवसेवा आश्रमले आजको दिनमा सातै प्रदेशको १९ जिल्लामा शाखा विस्तार गरि देशैभरि रहेका सहयोगापेक्षी सडक मानवहरूको व्यवस्थापन गर्दै आएको छ । आश्रमको संरक्षणमा १५०० जना व्यक्तिहरू आश्रित छन् । बागलुङ्ग जिल्लामा भने २०७३ सालदेखि शाखा संचालन गरेर सेवा प्रवाह गरिरहेको छ ।
