काठमाडौं ।राप्रपाले पार्टीको बृहत्तर हित र एकतामा आँच आउने गरि काम गरेको भन्दै चार नेतालाई २४ घण्टे स्पष्टीकरण सोधेको छ । पार्टी अध्यक्ष राजेन्द्र लिङ्देनको अध्यक्षतामा केन्द्रीय कार्यसम्पादन समितिको बैठकले नेताहरु दिलनाथ गिरी, दिलविकास राजभण्डारी, श्याम प्रसाद तिमल्सिना र राजाराम श्रेष्ठलाई स्पष्टीकरण सोध्ने निर्णय गरेको हो ।
बैठक पछि पार्टी प्रवक्ता मोहन श्रेष्ठले जारी गर्नुभएको विज्ञप्तिमा भनिएको केही व्यक्तिले पार्टीको नाम दुरुपयोग गर्दै भेला, छलफल र बैठक गरेको विषयलाई पार्टीले गम्भीर रुपमा लिएको छ । अनुशासनहिन गतिविधिलाई पार्टीले कुनै हालतमा छुट दिने छैन । पार्टीको हित विपरीतका गतिविधि जारी राख्ने, अनधिकृत वार्ता समिति बनाउने र सञ्चारमाध्यममा जथाभावी समाचार प्रकाशन, प्रशारण गर्ने, गराउने कार्यमा संलग्न भएकालाई २४ घण्टा भित्र लिखित स्पष्टीकरण सोध्ने र अनुशासन समितिलाई कारबाहीको लागि सिफारिस गर्ने निर्णय गरिएको छ ।
बिज्ञप्तिमा राप्रपाको नेतृत्व पंक्तिमा आन्तरिक विवाद भएको भन्दै विभिन्न सञ्चारमाध्यम र सामाजिक सञ्जालमा श्रृङखलाबद्ध तरिकाले प्रचारप्रसार भइरहेको विषयमा राप्रपाको गम्भीर ध्यानाकर्षण भएको जनाएको छ । पार्टीको नेतृत्व पंक्ति पूर्ण रुपले एकताबद्ध रहेको प्रष्ट पार्दे बिज्ञप्तिमा भनिएको पार्टीको हित विपरीत एवं नेतृत्व पंक्तिको मानमर्दन हुने गरि कुनै किसिमको गतिविधि र सामाजिक सञ्जालमा जथाभावी प्रचार नगर्न नगराउन पार्टीका सबै तहलाई बैठकले आग्रह गरेको छ । यस्तो गतिविधिमा संलग्न भएको पाइएमा कडा कारबाही गर्ने निर्णय गरिएको छ ।
यही असार २६ गते राप्रपा सम्बद्ध राष्ट्रिय प्रजातान्त्रिक महिला संगठन सम्बद्ध महिलाहरूका बिच उत्पन्न विवाद र उक्त विवादमा पार्टीका महामन्त्रीद्वय कुन्तिकुमारी शाही र राजेन्द्र गुरुङसमेतको नाम जोडेर विभिन्न संचार माध्यम तथा सामाजिक सञ्जालमा विशेष गरी महामन्त्री कुन्तिकुमारी शाहीको चरित्र हत्या हुने गरी आएको समाचारप्रति राप्रपाको ध्यानाकर्षण भएको जनाएको छ । राप्रपाले गलत समाचारहरूबाट भ्रममा नपर्न र यसप्रकारका क्रियाकलापमा सामेल नहुन समेत पार्टीका सबै तहका नेता कार्यकर्तामा राप्रपा आग्रह गरेको छ ।
