काठमाडौँ । प्रमुख प्रतिपक्षी नेकपा (एमाले) ले सरकारले संसद्मा दर्ता गराएको संवैधानिक परिषद् सम्बन्धी विधेयक तत्काल फिर्ता लिन माग गरेको छ ।
प्रतिनिधिसभाको बुधबार बसेको बैठकमा एमाले सांसद शिवमाया तुम्बाहाम्फेले सो विधेयक फिर्ता लिन माग गर्नुभएको हो । उहाँले आफैँले गैरसंवैधानिक भनिएको विषयवस्तु राखेर सोही किसिमको विधेयक ल्याउनु पर्ने कारण सरकारले दिनुपर्ने बताउनुभयो ।
उहाँले तत्कालीन केपी शर्मा ओली नेतृत्वको सरकारले अध्यादेश ल्याउँदा गैरसंवैधानिक भयो भन्दै अदालत गएको र त्यो मुद्दा विचाराधीन रहेको जानकारी दिनुभयो । उहाँले सभामुख अग्निप्रसाद सापकोटालाई प्रश्न गर्दै भन्नुभयो, “गैरसंवैधानिक भनी मुद्दा दायर गरिएको र सर्वोच्च अदालतमा विचाराधीन रहेको विषयमा छलफल गर्न मिल्छ ?”
सर्वोच्च अदालतमा विचाराधीन मुद्दामा संसद्मा बसह गर्न नपाइने भन्दै उहाँले विधेयक फिर्ता हुनुपर्ने माग गर्नुभयो ।
