काठमाडौंः न्यायको लागि आवाज उठाउँदा उठाउँदै सात वर्ष अघि सत्याग्रह बसेकै अवस्थामा मृत्यु भएका नन्दप्रसाद अधिकारीको शव विगत सात वर्षदेखि अन्त्येष्टी हुन सकेको छैन ।
गोरखा फुजेलका अधिकारीका कान्छा छोरा कृष्णप्रसादलाई शसस्त्र द्वन्द्वका क्रममा २०६१ सालमा माओवादीले चितवनको टाँडीका हत्या गरेका थिए । त्यस बेलादेखि नै हत्यारालाई कारबाहीको माग गर्दै नन्दप्रसाद सहित पत्नी गंगामाया न्यायका लागि भौतारिरहे ।
न्यायका लागि सरकार, मानव अधिकार आयोग र अन्यत्र जताततै चहारे तर आफूले खोजे अनुसारको न्याय नपाएको भन्दै उनीहरुले अनसन जस्तो कठोर कदम उठाए । अनसनकै क्रममा २०७१ साल असोज ६ गते नन्दप्रसादको निधन भयो ।
पत्नी गंगामायाले आजसम्म पनि सत्याग्रहलाई निरन्तरता दिँदै आउनु भएको छ । अनसन बसेर स्वास्थ्य अवस्था कमजोर भएपछि सरकारले उपचारका लागि वीर अस्पतालमा पु¥याएको थियो । वीर अस्पतालको आईसीयूमा उपचाररत रहेकै अवस्थामा ५४ वर्षको उमेरमा निधन भएका अधिकारीको शवको अत्येष्टि कहिले हुन्छ अझै टुङ्गो भएको छैन ।
अधिकारी पत्नी गंगामाया पनि दोषीलाई कारबाही नहुँदासम्म सत्याग्रह कायम राख्ने अडानमा हुनहुन्छ । चौतर्फी दबाबपछि सरकारले घटनामा संलग्न भएको आरोपमा केहीलाई पक्राउ पनि गर्यो तर, आरोपितहरु अदालतबाट छुटेपछि अधिकारी दम्पतीले त्यागेको अनसन फेरि थाले ।
राष्ट्रिय मानव अधिकार आयोगले पनि पटक पटक कृष्णप्रसादको हत्या सम्बन्धमा तत्काल न्याय निरुपणमा सरकार उदासिन रहँदै आएको जनाउँदै घटनाका पीडितले न्याय प्राप्त गर्न नसकेको भन्दै सरकारको ध्यानाकर्षण गराएको थियो ।
अधिकारीको निधन पनि आयोगले जारी गरेको विज्ञप्तिमा भनिएको छ, ‘नन्दप्रसाद अधिकारीको शवको आफ्नो धर्म संस्कृति अनुसार अन्त्येष्टी हुन पाउने शरीरको अधिकारको सम्मान गर्न तथा पीडितलाई न्याय प्रदान गर्नका लागि तत्काल पहल गर्न आयोग नेपाल सरकारको पुनः ध्यानाकर्षण गराउँदछ ।
अधिकारी दम्पतीको सत्याग्रहलाई नजिकबाट नियालीरहनु भएका अधिकारकर्मी चरण प्रसाई भन्नुहुन्छ, नन्दप्रसादले बालेको न्यायको दियो निभ्न नदिऔं। राजनीतिले अपराध गर्न पाउँदैन र अपराध गर्नेलाई पनि छुट हुँदैन भन्ने संदेश फैलाउनु पर्छ ।
