काठमाडौँ । विद्यार्थीमाथि यौन दुव्र्यवहार गर्ने चाबहिलको सेन्ट लरेन्स कलेजका एक शिक्षक पक्राउ परेका छन्। कलेजका कोअर्डिनेटर जनार्दन अधिकारीलाई प्रहरी वृत्त, गौशालाले पक्राउ गरेको हो। उनी सामाजिक विषयका शिक्षकसमेत हुन् ।
यौन दुव्र्यवहार गर्ने शिक्षकलाई कारबाही गर्न माग गर्दै विद्यालयकै युनिफर्ममा प्रहरी वृत्त, गौशालामा आन्दोलनमा विद्यार्थीहरु उत्रिएपछि प्रहरीले ती शिक्षकलाई पक्राउ गरेको हो ।
छलफल गर्नुपर्ने छ भनी मंगलबार प्रहरीले शिक्षक र अभिभावकलाई गौशालास्थित प्रहरी वृत्तमा बोलाएको थियो । छलफलका लागि शिक्षक आएलगत्तै प्रहरीले उनलाई नियन्त्रणमा लिएको हो ।
पीडित विद्यार्थीले उजुरी दिएका आधारमा उनलाई पक्राउ गरिएको काठमाडौँ प्रहरी प्रमुख वरिष्ठ प्रहरी उपरीक्षक सुदीप गिरीले बताए । प्रहरी वृत्तबाहिर अहिले पनि विद्यार्थीहरुले प्रदर्शन गरिरहेको बताइएको छ ।
पक्राउ परेका शिक्षक अधिकारी नेकपा (एमाले)का नेता पनि हुन् । एमाले नेता गोकुल बाँस्कोटा सञ्चार तथा सूचना प्रविधिमन्त्री हुँदा उनी मिडिया विश्लेषकमा नियुक्त भएका थिए । साथै विसं २०७४ मा प्रदेशसभा सदस्यको उम्मेदवारमा एमालेको काभ्रे जिल्ला समितिले उनलाई सिफारिससमेत गरेको थियो । यद्यपि उनले टिकट भने पाउन सकेका थिएनन् ।
कोअर्डिनेटर अधिकारीले विद्यालयकी एक छात्रालाई पछिल्लो एक/दुई महिनायता यौन दुर्व्यवहार गर्दै आएको भन्दै विद्यार्थीहरु आन्दोलित भएका थिए ।
फेसबुकमा उनले ‘तिमीले मिनिस्कर्ट लगाएको कस्तो सेक्सी देखिएको कमेन्ट गरेका थिए । साथै उनले ‘विल यु बि माई बेड पार्टनर ?’ ‘तिम्रो घर टाढा छ मेरो घरमै बस। भाडा पनि लिदिनँ। गाडी भाडा पनि मै दिन्छु। कलेजमा पनि फ्री गरिदिन्छु। तिमीले मेरो बेडको स्याटिस्फ्याक्सन पूरा गरिदिनुपर्यो ।’ जस्ता कमेन्टसमेत लेखेका थिए ।
