काठमाडौं । भरतपुर महानगरपालिकाको मेयरमा दोस्रो कार्यकालका लागि निर्वाचित रेणु दाहालले यो आफ्नो अन्तिम कार्यकाल हुने बताएकी छन् ।
मंगलबार मतपरिणाम सार्वजनिक पछि सञ्चारकर्मीसँग कुराकानी गर्दै उनले स्थानीय सरकार प्रमुखको रुपमा यो अन्तिम कार्यकाल हुने प्रस्ट पारेकी हुन् ।
उनले भनिन् ‘पाँच वर्षमा राम्रो अनुभव हामीले प्राप्त गर्यौँ, त्यसै अनुभवको आधारमा अबको पाँच वर्ष स्थानीय तहको प्रमुखको रुपमा यो मेरो अन्तिम कार्यकाल हो । मैले अन्तिम पटकका लागि जुन अवसर पाएको छु यसलाई एक सेकेन्ड पनि खेर नफालेर आफूले भ्याएसम्म जनतालाई निराश हुन दिनेछैन ।’
आगामी पाँच वर्षमा भरतपुरका ठूला आयोजना सिटी हल, प्रशासकीय भवन निर्माण पूरा गर्ने, क्रिकेट रंगशाला निर्माण गर्ने र भरतपुरको ढल तथा फोहोर व्यवस्थापनलाई प्राथामिकतामा राखेर काम गर्ने उनको भनाई छ । आफ्नो दोस्रो कार्यकाल शिक्षा, स्वास्थ्य र पूर्वाधार विकासमा केन्द्रित हुनेमा उनले जोड दिइन् ।
