काठमाडौं । वीरगञ्ज महानगरपालिकामा जनता समाजवादी पार्टी (जसपा) का प्रमुख पदका उम्मेदवार राजेशमान सिंहले आफ्नो अग्रतालाई फराकिलो बनाउँदै लगेका छन् ।
पछिल्लो मतगणनाअनुसार सिंहले नेकपा (एमाले) का उम्मेदवार विजयकुमार सरावगीलाई आठ हजार ३४५ मतले पछि पारेका छन् ।
अहिलेसम्म सो महानगरमा १२ वटा वडाको ३१ हजार ७०१ मत गणना भइसकेको छ । सिंहले १७ हजार दुई मत प्राप्त गरेका छन् । सरावगीले भने अहिलेसम्म आठ हजार ६५७ मत मात्र ल्याएका छन् । राष्ट्रिय प्रजातन्त्र पार्टी (राप्रपा) का उम्मेदवार गिरिश गिरीले जम्मा ७७९ मत पाएका छन् ।
त्यस्तै पोखरा महानगरपालिकामा नेकपा (एकीकृत समाजवादी) का प्रमुख पदका उम्मेदवार आफ्नो अग्रतालाई बढाएका छन् । पोखरामा अहिलेसम्म ५२ हजार ८१७ मतगणना भइसक्दा आचार्यले २१ हजार ८१७ मत प्राप्त गरेका छन् । उनलाई पछ्याउँदै एमालेका उम्मेदवार कृष्ण थापाले १९ हजार ३८८ मत हासिल गरेका छन् । अहिले आचार्य थापाभन्दा दुई हजार ४९५ मतले अगाडि छन् ।
महानगरको प्रमुख पदमा अर्का उम्मेदवार राप्रपाका शंकर खरालले दुई हजार १८६ मत पाएका छन् ।
