गोरखा । पूर्वप्रधानमन्त्री एवं जनता समाजवादी पार्टी (जसपा) नेता डा बाबुराम भट्टराईको गृहनगर पालुङटार नगरपालिकामा नेकपा (माओवादी केन्द्र) ले विजय भएको छ ।
सो नगरपालिकामा माओवादी केन्द्रका प्रमुख र उपप्रमुख दुवै उम्मेदवार निर्वाचित भएका हुन् । विवश चिन्त छ हजार ७२ मतका साथ प्रमुख पदमा निर्वाचित भएका हुन् । उनका निकटतम प्रतिस्पर्धी जसपाका प्रेमबहादुर गुरुङले पाँच हजार ७१७ मत प्राप्त गरे ।
यसैगरी उपप्रमुख पदमा माओवादी केन्द्रकै बन्दना पाण्डे पाँच हजार ५७९ मत ल्याई विजयी भइन् । उपप्रमुख पदमा उनका निकटतम प्रतिद्वन्द्वी नेपाली कांग्रेसका उम्मेदवार चेतकुमारी श्रेष्ठले पाँच हजार ७७ मत प्राप्त गरिन् ।
स्थानीय तहको निर्वाचनमा नेपाली कांग्रेसले जसपाका उम्मेदवारलाई सहयोग गर्न निर्देशन दिएको थियो । तर स्थानीयस्तरमा असन्तुष्टि बढेपछि कांग्रेस र जसपाबीचको चुनावी तालमेल सफल हुन सकेन ।
यसअघिको स्थानीय तहको निर्वाचनमा पालुङटार नगरपालिकाको प्रमुखमा कांग्रेस र उपप्रमुखमा माओवादी केन्द्रका उम्मेदवार निर्वाचित भएका थिए ।
