काठमाडौँ । प्रमुख विपक्षी नेकपा एमाले प्रतिनिधिसभाको कार्यव्यवस्था परामर्श समितिको बैठकमा अनुपस्थित भएको छ । सभामुख अग्नि प्रसाद सापकोटाले बजेट अधिवेशनको पहिलो दिन संसद भवनमै कार्यव्यवस्था परामर्श समितिको बैठक राखे पनि सो बैठकमा एमाले सहभागी भएन ।
अहिले पनि बानेश्वरस्थित संघीय संसद भवनको शंकर हलमा कार्यव्यवस्था परामर्श समितिको बैठक जारी छ । एमालेले यसअघि पनि कार्यव्यवस्था परामर्श समितिको बैठक बहिष्कार गर्दै आएको थियो । गत भदौ २३ गतेदेखि एमालेले संसद्मा निरन्तर अवरोध गर्दै आएको छ ।
एमालेले पार्टी विभाजनमा सभामुख सापकोटाको समेत भूमिका रहेको आरोप लगाउँदै आएको छ । सभामुखले नै निकास दिनुपर्ने सो पार्टीको माग छ ।
एमालेले माधव नेपालसहित १४ जना सांसदलाई कारबाही गरेको थियो । सो कारवाहीसम्बन्धी सूचना टाँस्नुपर्ने एमालेको माग छ । आफ्ना सांसदलाई कारबाही गरेको सूचना नटाँसे सभामुखले राजीनामा दिनुपर्ने एमालेले शर्त राखेको छ । यी दुवै माग पूरा नभएकाले एमालेले संसद्मा अवरोध गर्दै आएको छ ।
एमालेबाट फुटेर बनेको नेकपा (एकीकृत समाजवादी) को अस्तित्वलाई एमालेले अहिलेसम्म स्वीकार गरेको छैन । यद्यपि माधव नेपाल नेतृत्वको एकीकृत समाजवादी पार्टी निर्वाचन आयोगमा दर्ता भएको ९ महिना बितिसकेको छ र उसले स्थानीय तहको चुनावमा भाग लिइसकेको छ।
