बामपन्थी राजनीतिको गढ मानिएको कीर्तिपुर नगरपालिकामा प्रमुख र उपप्रमुख सहित ४६ जनप्रतिनिधि नेपाली कांग्रेसबाट विजयी भएका छन् । नेकपा एमालेले भने यहाँ दुई महिला सदस्य मात्र निर्वाचित गराउन सफल भएको छ ।
२०७४ सालको स्थानीय चुनावमा एमालेले प्रमुख, उपप्रमुख, ७ वडाध्यक्षसहित ३४ जनप्रतिनिधि जितेको थियो । एमालेका रमेश महर्जनले कांग्रेसका राजकुमार नकर्मीलाई दुई हजार ६०० भन्दा बढी मतान्तरले हराउनु भएको थियो ।
यो पटक कांग्रेसले राजकुमारलाई नै उम्मेदवार बनाएको थियो । एमालेले निवर्तमान नगर प्रमुख रमेश महर्जनको साटो केशरत्न बज्राचार्यलाई उम्मेदवार बनाएको थियो ।
कांग्रेसले अहिले नगर प्रमुख, उपप्रमुख, १० मध्ये ९ वडाध्यक्ष र ३३ वडा सदस्य जितेको छ । अन्यत्र गठबन्धन गरेको माओवादी केन्द्र र एकीकृत समाजवादी पनि कीर्तिपुरमा कांग्रेससँग प्रतिस्पर्धामा थियो ।
नकर्मी ९ हजार ४३ मतका साथ प्रमुखमा निर्वाचित हुनु भएको छ । एमालेका बज्राचार्यले ५ हजार ५०७ मत प्राप्त गर्नु भएको छ । उपप्रमुखमा पनि कांग्रेसकै शुभलक्ष्मी शाक्य निर्वाचित हुनुभयो । उहाँले ८ हजार ६६५ मत ल्याउनु भएको थियो जबकी उहाँकी प्रतिस्पधी एमालेकी उम्मेदवार विन्दु महर्जनले ७ हजार २०६ मत प्राप्त गर्नु भयो ।
माओवादी केन्द्रबाट प्रमुखका उम्मेदवार बनेका शिवशरण महर्जनले ४ हजार ९० र उपप्रमुखका उम्मेदवार सुशीला बस्नेतले २ हजार २४० तथा एकीकृत समाजवादीका प्रमुखका उम्मेदवार वटुकृष्ण थापाले १ हजार १५३ तथा उपप्रमुखकी उम्मेदवार कमला महर्जनले ८७२ मत प्राप्त गर्नुभयो ।
काठमाडौंकै दक्षिणकाली नगरपालिकामा पनि नेपाली कांग्रेसले प्रमुख र उपप्रमुखमा जित दर्ता गरेको छ ।
