सर्लाहीको रामनगर गाउँपालिकामा अध्यक्ष पदमा सम्भवतः नेपालकै कान्छो उम्मेदवार रामबाबु यादव निर्वाचित भएका छन् ।
नेकपा (माओवादी केन्द्र) बाट अध्यक्षका उम्मेदवार यादव २२ वर्षको उमेरमा अध्यक्षमा निर्वाचित भएका हुन् । उनले चार हजार ८१ मत ल्याउँदा उनका निकटतम प्रतिस्पर्धी नेपाली कांग्रेसका हरिनन्दनप्रसाद यादवले दुई हजार ३९२ मत प्राप्त गरे ।
त्यसैगरी अध्यक्ष पदमा स्वतन्त्र उम्मेदवार केएस राहुल बर्माले एक हजार ७०७ मत प्राप्त गरे ।
रामनगर गाउँपालिकाको उपाध्यक्षमा समेत माओवादी केन्द्रले जित हात पारेको छ । माओवादी केन्द्रका उम्मेदवार गीता देवी तीन हजार ५२३ मत प्राप्त गरी विजयी भइन् । उनका निकटतम प्रतिद्वन्द्वी कांग्रेसकी कोशिला साहले दुई हजार ६३७ मत प्राप्त गरीन ।
विसं २०७४ को स्थानीय तहको निर्वाचनमा यो गाउँपालिकामा नेपाली कांग्रेसका कृष्णप्रसाद बर्मा अध्यक्षमा निर्वाचित भएका थिए ।
हाल काठमाडौँमा बीबीएस अध्ययन गरिरहेका नवनिर्वाचित अध्यक्ष यादव पूर्वसांसद शिवपुजन राय यादवका छोरा हुन् ।
