काठमाडौँ । स्थानीय तहको निर्वाचनमा काठमाडौँ महानगरपालिकाको मेयर पद अहिले सर्वाधिक चासोको विषय बनेको छ । पाँच दलीय सत्ता गठबन्धन र नेकपा (एमाले) का लागि पनि प्रतिष्ठाको विषय बनेको यहाँको निर्वाचनमा स्वतन्त्र उम्मेदवार बालेन शाहले अग्रता बनाउँदै गर्दा यो महानगरपालिका मात्र नभई मुलुकभर यसको बढी चर्चा भएको छ ।
पछिल्लो मतगणनामा स्वतन्त्र उम्मेदवार बालेनले दुई हजार ४५७ मत हासिल गर्दा एमाले उम्मेदवार केशव स्थापितले एक हजार ४२७ र सत्ता गठबन्धनबाट नेपाली कांग्रेसकी सिर्जना सिंहले एक हजार १६८ मत पाउनुभएको छ । त्यसैले यसपटकको निर्वाचनमा काठमाडौँ महानगरमा स्वतन्त्र उम्मेदवार बालेनले मेयर पद उछिट्याउने हुन् की भन्ने अनुमान गरिएको छ ।
यसैबीच काठमाडौँ महानगरको निर्वाचनमा भइरहेको मतगणनालाई लिएर खोटाङमा बालेनको जित र हारलाई लिएर बाजी परेको छ । खोटाङको दिक्तेल रुपाकोट मझुवागढी नगरपालिका–५ का विजय फुँयाल र सोही वडा बस्ने रमेश खड्का बीच बाजी परेको छ ।
साक्षी किनारा राखी गरिएको कागजअनुसार यदि बालेन शाहले मेयर पदमा जिते खड्काले २८ केजीको खसी दिने र बालेनले नजितेको अवस्थामा फुँयालले खड्कालाई २८ केजी खसीको मूल्यबराबर रकम भुक्तानी गर्ने सहमति भएको छ ।
