धनगढीः सुदुरपश्चिम प्रदेशमा रहेका ८८ वटा स्थानीय तहमा मतगणनाका प्रारम्भिक विवरणहरु प्राप्त भइरहेका छन् । यी मतपरिणामका प्रारम्भिक रुझानले यस प्रदेशमा नेपाली कांग्रेस र नेकपा एमालेका उम्मेदवारबीच नै मुख्य प्रतिस्पर्धा देखिएको छ भने नेकपा (माओवादी केन्द्र) ले दुबै दललाई पछ्याइरहेको छ ।
यस प्रदेशमा एक उपमहानगरपालिका, ३३ नगरपालिका र ५४ गाउँ पालिका छन् ।
नेपाली कांग्रेसका सभापति एवं प्रधानमन्त्री शेर बहादुर देउवाको बलियो पकड रहेको भनिएको यस प्रदेशमा चुनावी परिणामहरुका आधारमा हेर्दा पनि नेपाली कांग्रेस २८ स्थानीय तहमा प्रमुख वा अध्यक्षका पदमा अग्रता बनाइरहेको छ भने नेकपा एमालेले १६ स्थानमा अगाडि छ । त्यस्तै नेकपा माओवादी केन्द्रले १३ स्थानमा अग्रता कायम गरेको छ ।
तर एमालेबाट फुटेको नेकपा (एकीकृत समाजवादी) भने आशा गरे अनुरुप प्रदर्शन गर्न सकेको छैन । यहाँबाट साँझ ६ बजेसम्म एक उम्मेदवारले मात्र अग्रता बनाइरहेका छन् । अन्य उम्मेदवारले ५ स्थानमा अग्रता कायम गरेका छन् ।
